రెండు మూడు రోజుల్లో తెలంగాణకు పరిష్కారం: ఏరాసు

By Srinivas

Published: Friday, July 8, 2011, 14:20 [IST]

హైదరాబాద్: తెలంగాణ అంశం మరో రెండు మూడు రోజుల్లో తేలుతుందని మంత్రి ఏరాసు ప్రతాప్ రెడ్డి శుక్రవారం విలేకరులతో మాట్లాడుతూ స్పష్టం చేశారు. తెలంగాణ ప్రాంత కాంగ్రెసు పార్టీ రాజీనామా చేసినంత మాత్రం రాష్ట్ర ప్రభుత్వానికి ఎలాంటి ఇబ్బందులు లేవని సీమాంధ్ర ప్రజాప్రతినిధులు రాజీనామా చేస్తేనే ప్రభుత్వం పడిపోతుందని అన్నారు. సీమాంధ్ర నేతలమంతా సమైక్యాంధ్రకే కట్టుబడి ఉన్నామని చెప్పారు. అయినప్పటికీ అధిష్టానం తీసుకున్న నిర్ణయానికి కట్టుబడి ఉంటామని చెప్పారు. అయితే అధిష్టానం తెలంగాణకు అనుకూలంగా నిర్ణయం తీసుకున్న పక్షంలో రాజధాని, నీరు, ప్యాకేజి సమస్యను పరిష్కరించాలని డిమాండ్ చేశారు.

తెలంగాణ సమస్యపై అధిష్టానం ఇప్పటికైనా కళ్లు తెరవడం హర్షించదగ్గ విషయం అన్నారు. తెలంగాణ రాష్ట్ర సమితి, తెలుగుదేశం పార్టీలు అధికారం కోసం ప్రయత్నాలు చేస్తున్నాయని ఆరోపించారు. అధిష్టానాన్ని తాము సమైక్యాంధ్రనే ఉంచమని కోరుతామని చెప్పారు. తెలంగాణకు సిద్ధపడితే సీమలో కరవుకు, ఆంధ్ర ప్యాకేజీకి పరిష్కారం చూపాలన్నారు. మరో రెండు మూడు రోజుల్లో తెలంగాణ అంశం తేలుతుందని ఆయన అభిప్రాయపడ్డారు.

Published On July 8, 2011