రాజీనామాలపై తొందరపాటు ఉండదు: స్పీకర్ నాదెండ్ల

By Srinivas

Published: Sunday, July 10, 2011, 15:01 [IST]

న్యూఢిల్లీ: తెలంగాణ ప్రజాప్రతినిధుల రాజీనామాలపై తొందరపాటు నిర్ణయం తీసుకోనని అలాంటి తొందరపాటు నిర్ణయం తీసుకోవడం క్షేమకరం కాదని సభాపతి నాదెండ్ల మనోహర్ ఆదివారం న్యూఢిల్లీలో విలేకరులతో మాట్లాడుతూ చెప్పారు. రాజీనామాలపై ఏం నిర్ణయం తీసుకుంటానో అప్పుడే ఎలా చెప్పగలను అని అన్నారు. హైదరాబాదు వచ్చిన తర్వాత రాష్ట్ర పరిస్థితులపై అవగాహన చేసుకున్న తర్వాత రాజీనామాలు పరిశీలిస్తానని చెప్పారు.

రాజీనామాలపై ఏకపక్ష నిర్ణయాలు తీసుకోనన్నారు. రాజీనామాలు చేసిన వారందరితోనూ మాట్లాడతానని చెప్పారు. ప్రజాప్రతినిధుల అభిప్రాయాలు తెలుసుకున్న తర్వాతే నిర్ణయం తీసుకుంటానని చెప్పారు. శాసనసభ్యుల గౌరవాన్ని దృష్టిలో పెట్టుకొని నిర్ణయం తీసుకోవాల్సి ఉంటుందన్నారు. న్యాయా, రాజ్యాంగ నిపుణులతో చర్చిస్తానని చెప్పారు. రాష్ట్ర పరిస్థితులపై పూర్తి సమాచారం తెప్పించుకుంటానని అన్నారు. కాగా ఈ నెల 13న నాదెండ్ల మనోహర్ హైదరాబాదు రానున్నారు.

Published On July 10, 2011