తెలంగాణ బంద్: బస్సులే ఆందోళనకారుల టార్గెట్లు

By Srinivas

Published: Friday, July 22, 2011, 11:23 [IST]

హైదరాబాద్: తెలంగాణ రాజకీయ ఐక్య కార్యాచరణ సమితి తెలంగాణ బందుకు పిలుపునిచ్చినప్పటికీ దానిని నిర్లక్ష్యం చేస్తూ బస్సులు తిరగడంతో తెలంగాణ వాదులు ఆగ్రహించి పలు బస్సులను శుక్రవారం దగ్ధం చేశారు. హైదరబాదు జిల్లాలోని పరిసర ప్రాంతాల్లో సుమారు ముప్పై వరకు బస్సులను తెలంగాణ వాదులు ధ్వంసం చేశారు. దిల్‍‌సుఖ్ నగర్ పరిసరాల్లో ఇరవై బస్సుల వరకు, ఇబ్రహీంపట్నంలో మూడు, ఆచార్య ఎన్జీ రంగా యూనివర్సీటీకి చెందిన నాలుగు బస్సులు, ఆర్టీసి క్రాసు రోడ్స్, కూకట్ పల్లి, జీడిమెట్ల తదితర ప్రాంతాల్లో పలు బస్సులను ధ్వంసం చేశారు.

బందును లక్ష్య పెట్టకుండా నడిపిన ప్రైవేటు, ప్రభుత్వం బస్సులను ధ్వంసం చేశారు. అయితే తెలంగాణలోని మిగతా జిల్లాల్లో బంద్ ప్రశాంతంగా సాగుతుండగా, హైదరాబాదులో బస్సులు తిరుగుతున్నందున చాలా నష్టం జరిగింది. గుంటూరు నుండి హైదరాబాదు వస్తున్న ఓ బస్సుపై బిఎన్ రెడ్డి నగర్ వద్ద ఆందోళనకారులు రాళ్లు విసరడంతో డ్రైవర్‌కు, కండక్టర్‌కు తీవ్ర గాయాలయ్యాయి. కాగా నగరంలో 70 శాతంకు పైగా బస్సులు తిరుగుతున్నాయని ఆర్టీసి ఈడి ప్రకటించారు. ఆందోళకారులు పలు బస్సులపై విధ్వంసం సృష్టించారని చెప్పారు.

Published On July 22, 2011