సిఎం చెప్పినట్లుగా పరిష్కారం: పిసిసి చీఫ్ బొత్స సత్తిబాబు

By Srinivas

Published: Sunday, August 28, 2011, 12:40 [IST]

విశాఖపట్నం: వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి వర్గం శాసనసభ్యుల రాజీనామాలపై నిర్ణయం స్పీకర్ నాదెండ్ల మనోహర్‌దేనని ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ ఆదివారం విశాఖపట్నంలో అన్నారు. తూర్పు గోదావరి జిల్లా పర్యటన నిమిత్తం ఆయన విశాఖ వచ్చారు. ఈ సందర్భంగా విమానాశ్రయంలో మీడియాతో మాట్లాడారు. రాజీనామాల ఆమోదం స్పీకర్ నిర్ణయంపై ఆధారపడి ఉంటుందని చెప్పారు. తెలుగుదేశం పార్టీ అధినేత చంద్రబాబు నాయుడు తన ఆస్తులు ప్రకటిస్తానని చెప్పడం హాస్యాస్పదం అన్నారు.

ముఖ్యమంత్రి కిరణ్ కుమార్ రెడ్డి చెప్పినట్లుగా త్వరలో తెలంగాణ సమస్యకు పరిష్కారం లభిస్తుందన్నారు. రాష్ట్రంలోని పరిస్థితులను చక్కదిద్దేందుకు కేంద్రం ప్రయత్నాలు చేస్తోందన్నారు. పర్యటన ద్వారా కార్యకర్తల్లో ఉత్సాహం నింపుతామని చెప్పారు. కాగా విశాఖ నుండి తుని వెళ్లిన బొత్స అక్కడ ఎనిమిదిన్నర కోట్లతో ఏర్పాటు చేసే రక్షిత మంచినీటి పథకానికి ఆయన శంఖుస్థాపన చేశారు.

Published On August 28, 2011