తెలంగాణ వ్యాఖ్యలపై వెనక్కి తగ్గిన రోశయ్య

By Srinivas

Published: Tuesday, August 30, 2011, 14:45 [IST]

హైదరాబాద్: తెలంగాణ వ్యాఖ్యలపై మాజీ ముఖ్యమంత్రి రోశయ్య వెనక్కి తగ్గారు. వీధి పోరాటాలతో తెలంగాణ సాధించలేరన్న తన వ్యాఖ్యలు వెనక్కి తీసుకుంటున్నట్లు రోశయ్య మంగళవారం మధ్యాహ్నం చెప్పారు. శాసనమండలి సభ్యత్వానికి రాజీనామా చేసిన అనంతరం ఆయన మీడియా ప్రతినిధులతో మాట్లాడారు. సుదీర్ఘ రాజకీయ అనుభవంలో సంతృప్తిగా ఉన్నట్లు చెప్పారు. టాలెంట్ చూసి పదవులు వస్తాయని తాను భావించడం లేదన్నారు. నిబద్దతతో పని చేసినప్పటికీ కొందరికే పదవులు వస్తాయని అందులో తాను ఒకడినని అన్నారు.

వీధీ పోరాటాలతో అన్న తన వ్యాఖ్యలు కొందరిని ఇబ్బంది పెడితే వెనక్కి తీసుకుంటున్నట్లు చెప్పారు. నా రాజకీయ జీవితం శాసనమండలితో ప్రారంభమై శాసనమండలితోనే ముగియడం సంతోషంగా ఉందన్నారు. మండలి వాతావరణం ఆహ్లాదంగా ఉందన్నారు. తనకు సహకరించిన అందరికీ కృతజ్ఞతలన్నారు. కాగా రోశయ్య రాజీనామాను మండలి చైర్మన్ చక్రపాణి ఆమోదించారు. రోశయ్య బుధవారం సాయంత్రం గం.4.22 నిమిషాలకు తమిళనాడు గవర్నర్‌గా ప్రమాణ స్వీకారం చేయనున్నారు.

Published On August 30, 2011