బొత్స బహిరంగ సభలో వైయస్ జగన్ వర్గం రగడ

By Srinivas

Published: Friday, September 2, 2011, 19:05 [IST]

విజయవాడ: ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ పాల్గొన్న బహిరంగ సభలో శుక్రవారం వైయస్సార్ కాంగ్రెసు పార్టీ కార్యకర్తలు గందరగోళం సృష్టించారు. దివంగత ముఖ్యమంత్రి వైయస్ రాజశేఖర రెడ్డి ద్వితీయ వర్దంతి సందర్భంగా విజయవాడలో బొత్స సత్యనారాయణ వైయస్ విగ్రహాన్ని ఆవిష్కరించారు. ఈ సందర్భంగా వైయస్సార్సీ, కాంగ్రెసు పార్టీ, కాంగ్రెసు పార్టీ నేతల మధ్య రగడ చోటు చేసుకుంది. దివంగత వైయస్ విగ్రహావిష్కరణ సందర్భంగా ముందుగానే అవాంఛనీయ సంఘటనలు జరగవచ్చునని ఊహించిన పోలీసులు భారీ భద్రత ఏర్పాటు చేశారు. ముందుగానే పలువురు వైయస్సార్సీ నేతలను అదుపులోకి తీసుకున్నారు.

అయినప్పటికీ సుమారు వంద నుండి రెండు వందల మంది వైయస్సార్సీ కార్యకర్తలు మహిళలతో సహా బహిరంగ సభలో కూర్చున్నారు. మధ్యలో బొత్సకు, కాంగ్రెసుకు వ్యతిరేకంగా నినాదాలు చేశారు. బొత్స గో బ్యాక్ అంటూ అరిచారు. కుర్చీలను కాంగ్రెసు కార్యకర్తల పైకి విసిరారు. దీంతో ఇరువర్గాల మధ్య ఉద్రిక్త పరిస్థితి ఏర్పడింది. పోలీసులు జోక్యం చేసుకొని వైయస్సార్సీ పార్టీ కార్యకర్తలను అదుపులోకి తీసుకున్నారు. కాగా ఈ కార్యక్రమంలో బొత్సతో పాటు మంత్రులు కన్నా లక్ష్మి నారాయణ, గల్లా అరుణ కుమారి, డొక్కా మాణిక్య వరప్రసాద్, వట్టి వసంత్ కుమార్ తదితరులు పాల్గొన్నారు.

Published On September 2, 2011