రైల్ రోకో: తెలంగాణలో స్తంభించిన రవాణా వ్యవస్థ

హైదరాబాద్: తెలంగాణలో రవాణా వ్యవస్థ పూర్తిగా స్తంభించింది. శనివారం ఉదయం నుంచి రైళ్ల రాకపోకలు కూడా స్తంభించాయి. బస్సులు, ఆటోలతో పాటు రైళ్లు కూడా ఆగిపోవడంతో రవాణాకు పూర్తి అంతరాయం కలుగుతోంది. తెలంగాణ జెఎసి ఇచ్చిన పిలువు మేరకు శనివారం ఉదయం నుంచే 48 గంటల రైల్ రోకో కార్యక్రమం ప్రారంభమైంది. సికింద్రాబాదు నుంచి నడవాల్సిన 55 ఎక్స్‌ప్రెస్ రైళ్లను, 22 ప్యాసింజర్ రైళ్లను ముందు జాగ్రత్త చర్యగా ఆపేసింది. మరో 55 రైళ్లను దారి మళ్లించారు. సికింద్రబాదు వరకు రావాల్సిన రైళ్లను విజయవాడలోనే ఆపేస్తున్నారు.

తెలంగాణ రాష్ట్ర ఏర్పాటును డిమాండ్ చేస్తూ తెలంగాణవాదులు శనివారం ఉదయమే రైలు పట్టాల మీదికి వచ్చారు. సికింద్రాబాదు, కాజీపేట, నల్లగొండ, మెదక్, ఆదిలాబాద్, ఖమ్మం జిల్లాల్లోని ముఖ్యమైన రైల్వే స్టేషన్లలో తెలంగాణవాదులు ఆందోళనకు దిగారు. రైల్వే స్టేషన్ల వద్ద భారీ పోలీసు బందోబస్తు ఏర్పాటు చేశారు. హైదరాబాదులో ఆటోలు కూడా బంద్ పాటిస్తున్నాయి. తెలంగాణలో బస్సులు నడవడం లేదు. పెట్రోల్ బంకులు బంద్ పాటిస్తున్నాయి. మద్యం షాపులను కూడా తెరవడం లేదు. కాగా, తెలంగాణలో సకల జనుల సమ్మె శనివారంనాడు 12వ రోజుకు చేరుకుంది. రైల్ రోకోను విజయంవంతం చేయడానికి ఆందోళనకారులు పట్టాలపైనే వంటావార్పూ పెట్టారు.

English summary

As 48 hours rail roko is started this morning transport system in Telangana totally paralyzed. Buses in Telangana and autos in Hyderabad are not running. Petrole bunks are closed.