అసెంబ్లీలో అర్ధరాత్రి నాగం బృందం హల్ చల్

హైదరాబాద్: తెలంగాణ నగారా సమితి చైర్మన్ నాగం జనార్ధన్ రెడ్డి, ఆయన బృందం శనివారం అర్ధరాత్రి అసెంబ్లీలో హల్ చల్ చేశారు. తమ రాజీనామాలను ఆమోదించాలంటూ డిప్యూటీ స్పీకర్ మల్లుభట్టి విక్రమార్క చాంబర్‌లో బైఠాయించిన నాగం బృందాన్ని పోలీసులు బయటకు తరలించడం.. దానిని నిరసిస్తూ తెలంగాణ న్యాయవాదుల ఐకాస, తెలంగాణ నగారా నాయకులు ఆందోళనకు దిగడంతో కొద్దిసేపు ఉద్రిక్త పరిస్థితి ఏర్పడింది. నాగం జనార్దన్‌రెడ్డి, జోగు రామన్న, వేణుగోపాలచారి, హరీశ్వర్‌రెడ్డిలు శనివారం ఉదయం అసెంబ్లీలోని డిప్యూటీ స్పీకర్ కార్యాలయంలో హల్‌చల్ చేశారు. రాజీనామాలను ఆమోదించే వరకు బయటకు వెళ్లేది లేదని భీష్మించారు. వారు డిప్యూటీ స్పీకర్ ఛాంబర్ నుండి ఎంతకూ బయటకు రాక పోవటంతో అర్ధరాత్రి సమయంలో పోలీసులు వారిని బయటకు పంపించే ప్రయత్నాలు చేశారు.

మొదట రాత్రి 11 గంటల సమయంలో చర్చలు జరుపుతామంటూ ఆందోళన చేస్తున్న ఎమ్మెల్యేలు ఉన్న గదిలోకి అసెంబ్లీ కార్యదర్శి వెళ్లారు. ఆయన వెంటే పోలీసులూ లోపలికి దూసుకెళ్లారు. దీంతో, విషయాన్ని గ్రహించిన నాగం జనార్దన్‌రెడ్డి స్పీకర్ యాంటీ రూమ్‌లోకి వెళ్లి గడియ వేసుకున్నారు. దీంతో, అక్కడే ఉన్న జోగు రామన్న, హరీశ్వర్‌రెడ్డిలను పోలీసులు అదుపులోకి తీసుకుని మీడియా కన్నుగప్పి మొదటి గేటు నుంచి బయటకు తరలించారు. ఆ తర్వాత, డిసిపి అకున్ సబర్వాల్ నేతృత్వంలోని పోలీసుల బృందం స్పీకర్ చాంబర్‌లోని యాంటీ రూమ్ తలుపులను పగులగొట్టింది. నాగంతోపాటు అక్కడే ఉన్న వేణుగోపాలచారిలను బయటకు తరలించింది.

అసెంబ్లీలో బైఠాయించిన ఎమ్మెల్యేలను అరెస్టు చేస్తున్నారన్న సమాచారం అందుకున్న తెలంగాణ న్యాయవాదుల ఐకాస, తెలంగాణ నగారా నాయకులు అక్కడికి చేరుకున్నారు. శాంతియుతంగా ఆందోళన చేస్తున్న ఎమ్మెల్యేలను పోలీసులు దౌర్జన్యంగా అరెస్టు చేయడాన్ని నిరసిస్తూ అసెంబ్లీ ఎదుట ఆందోళన నిర్వహించారు. దీంతో, పోలీసులు రంగంలోకి దిగి వారిని అరెస్టు చేశారు.

English summary

Telangana Nagara chairman and MLA Nagam Janardhan Reddy and his group mlas created hul chul at Assemly last night.