పైన ఒకరితో కింద ఒకరితో కాపురం: టిడిపి నేతలు

By Srinivas

Published: Sunday, October 2, 2011, 9:16 [IST]

హైదరాబాద్: ఆంధ్రప్రదేశ్ రాష్ట్ర విభజన వ్యవహారంలో కాంగ్రెసు పార్టీ మంచం పైన ఒకరితో కింద ఒకళ్లతో కాపురం చేసే వైఖరి మానుకోవాలని తెలుగుదేశం పార్టీ శాసనసభ్యుడు లింగారెడ్డి శనివారం హెచ్చరించారు. తెలంగాణ అంశంపై ఆ పార్టీ వైఖరి ఏమిటో తెలియనందు వల్లే రాష్ట్రంలో ఉద్యమాలు, అనిశ్చితి నెలకొందని విమర్శించారు. కొత్త రాష్ట్రాల కోసం దేశమంతటా డిమాండ్లున్నా కాంగ్రెసు పార్టీ ఈ ఒక్క రాష్ట్రంలోనే ప్రజలకు కాల్చుకు తింటోందన్నారు. అసెంబ్లీ తీర్మానంతోనే గతంలో రెండు ప్రాంతాలు కలిశాయని ఇప్పుడూ విభజన కావాలనుకుంటే తీర్మానంతోనే సాధ్యమన్నారు. తీర్మానం లేకుండా విభజన అసాధ్యమన్నారు.

రాష్ట్ర విభజనపై ఏ అఖిలపక్ష సమావేశాలకు తాము వెళ్లమని మరో నేత యనమల రామకృష్ణుడు వేరుగా అన్నారు. తమ పార్టీలోని రెండు ప్రాంతాల నేతలు ఇంతకుముందే సంయుక్తంగా ఈ నిర్ణయం తీసుకున్నారని చెప్పారు. తెలంగాణ నగారా సమితి చైర్మన్ నాగం జనార్ధన్ రెడ్డి సైతం అప్పుడు పార్టీలోనే ఉన్నారన్నారు. శ్రీకృష్ణ కమిటీ, కేంద్ర మంత్రి గులాం నబీ ఆజాద్ నివేదికలపై ఏ నిర్ణయం తీసుకునేది కేంద్ర ప్రభుత్వం నిర్ణయించుకోవాల్సి ఉంటుందన్నారు. తమ పార్టీ తెలంగాణ తెలుగుదేశం పార్టీ శాసనసభ్యులు రాజీనామా చేయడంలో తప్పు లేదని వారి ప్రాంతీయ పరిస్థితిలకు అనుగుణంగా రాజీనామా చేశారన్నారు.

Published On October 2, 2011