ఆన్‌లైన్ బిజినెస్ పేరుతో కోట్లకు టోకరా, ఫిర్యాదు

హైదరాబాద్: ఆన్‌లైన్ బిజినెస్ పేరుతో లక్షలకు టోకరా పెట్టి మోసం చేసిన మరో సంస్థ ఉదంతం వెలుగులోకి వచ్చింది. ప్రొఫెక్ సంస్థ పేరుతో ప్రజల నుంచి శ్రీనివాస్ అనే వ్యక్తి రెండు నుంచి నాలుగు కోట్ల రూపాయల వరకు వసూలు చేసి మోసం చేసినట్లు పోలీసులకు ఫిర్యాదు అందింది. విదేశాల్లో ఆన్‌లైన్ ట్రేడింగ్ చేస్తానని, ఇందులో పెట్టుబడులు పెట్టినవారికి లక్షకు 15 వేల రూపాయల కమిషన్ ఇస్తానని శ్రీనివాస్ నమ్మబలికాడు. దీంతో కొంత మంది పెద్ద యెత్తున పెట్టుబడులు పెట్టారు. లక్ష నుంచి రెండు లక్షల రూపాయల వరకు పెట్టుబడులు పెట్టారు. కమిషన్ వస్తుందనే ఆశతో వారు ఈ పెట్టుబడులు పెట్టారు. కానీ ప్రొఫెక్ సంస్థ నిండా ముంచింది.

ప్రొఫెక్ సంస్థ యజమాని శ్రీనివాస్ ఇచ్చిన చెక్కులు చెల్లలేదు. దానిపై అడిగితే వ్యాపారం సరిగా సాగలేదని, నష్టాలు వచ్చాయని శ్రీనివాస్ చెప్పినట్లు పెట్టుబడుదారులు ఫిర్యాదు చేశారు. గత 9 నెలలుగా శ్రీనివాస్ ఎవరికీ కమిషన్ ఇవ్వలేదు. తాను డబ్బులు ఇవ్వలేనని శ్రీనివాస్ చేతులెత్తేశాడు. దీంతో పెట్టుబడిదారులు పోలీసులకు ఫిర్యాదు చేశారు. పోలీసులు కేసు నమోదు చేసి దర్యాప్తు చేస్తున్నారు. పరారీలో ఉన్న శ్రీనివాస్ కోసం పోలీసులు గాలిస్తున్నారు.

English summary

A person by name Srinivas cheated public on the name of online business in Hyderabad.