జానారెడ్డి ఇంటి ముట్టడించిన టిఆర్ఎస్ ఎమ్మెల్యేలు

By Srinivas

Published: Sunday, November 6, 2011, 12:32 [IST]

హైదరాబాద్: పంచాయతీ రాజ్ శాఖ మంత్రి జానారెడ్డి ఇంటిని తెలంగాణ రాష్ట్ర సమితి ఎమ్మెల్యేలు, కార్యకర్తలు ఆదివారం ముట్టడించారు. ఉద్యమంలో పాల్గొన్న తెలంగాణవాదులపై పెట్టిన కేసులు ఎత్తి వేయాలని వారు డిమాండ్ చేశారు. ప్రభుత్వం కావాలనే ఉద్దేశ్య పూర్వకంగా తెలంగాణవాదులపై కేసులు నమోదు చేయిస్తుందని ఆరోపించారు. తెలంగాణవాదులపై కుట్ర పూరితంగా వ్యవహరిస్తే ఊరుకునేది లేదన్నారు. ఉద్యమకారులపై పిడి యాక్టు వంటి కఠిన కేసులు బనాయిస్తున్నారని ఆరోపించారు. జానారెడ్డి ఇంటి వద్ద బైఠాయించిన వారిలో ఎమ్మెల్యే హరీష్ రావు, ఈటెల రాజేందర్ తదితరులు ఉన్నారు. టిఆర్ఎస్ జానా ఇంటి ముట్టడి కారణంగా ఎలాంటి ఉద్రిక్త పరిస్థితులు తలెత్తకుండా భారీగా పోలీసులను మోహరించారు.

తన ఇంటి ముందు బైఠాయించిన ఈటెల, హరీష్ రావులను జానారెడ్డి పిలిపించుకొని మాట్లాడుతున్నట్లుగా తెలుస్తోంది. మరోవైపు మాజీ మంత్రి కోమటిరెడ్డి వెంకట్ రెడ్డి దీక్ష భగ్నం నేపథ్యంలో పలువురు కాంగ్రెసు నేతలు జానారెడ్డి ఇంటి వద్ద భేటీ అయ్యారు. ఎంపీ మధుయాష్కీ, మాజీ మంత్రి షబ్బీర్ అలీ, మంత్రి డిఎల్ రవీంద్రా రెడ్డి కోమటిరెడ్డిని పరామర్శించారు. ఈ సందర్భంగా డిఎల్ మాట్లాడుతూ కోమటిరెడ్డి ఆరోగ్యం నిలకడగా ఉందని వైద్యానికి సహకరించాలని తాను కోరినట్లు చెప్పారు. బీబీనగర్ నిమ్స్‌ను అభివృద్ధి చేస్తామని చెప్పారు.

Published On November 6, 2011