చంద్రబాబుపై 420 కేసు పెట్టిన హైదరాబాద్ పోలీసులు

By Srinivas

Published: Tuesday, November 8, 2011, 13:52 [IST]

హైదరాబాద్: తెలుగుదేశం పార్టీ అధినేత, మాజీ ముఖ్యమంత్రి నారా చంద్రబాబు నాయుడుపై హైదరాబాదు పోలీసులు మంగళవారం 420 కేసు నమోదు చేశారు. జనార్ధన్ గౌడ్ అనే న్యాయవాది ఇటీవల చంద్రబాబు తెలంగాణ విషయంలో చీటింగ్ చేశారని ఫిర్యాదు చేసిన విషయం తెలిసిందే. దీనిపై పోలీసుల నుండి ఎలాంటి స్పందన లేకపోవడంతో సదరు న్యాయవాది మంగళవారం రంగారెడ్డి జిల్లా కోర్టులో పిటిషన్ దాఖలు చేశారు. తాను చేసిన ఫిర్యాదుపై ఎవరూ స్పందించలేదని ఆయన పిల్ దాఖలు చేశారు. స్పందించిన కోర్టు ఇందుకు సంబంధించి వారం రోజుల్లో వివరణ ఇవ్వాలని న్యాయస్థానం అధికారులను ఆదేశించింది.

విచారణను వచ్చే వారానికి వాయిదా వేసింది. కాగా పక్షం రోజుల క్రితం జనార్ధన్ గౌడ్ తెలంగాణకు తాను సానుకూలంగా ఉన్నానని మొదట చెప్పిన చంద్రబాబు కేంద్రం తెలంగాణ ఇచ్చాక మాటమార్చి నాలుగున్నర కోట్ల తెలంగాణ ప్రజలను చీటింగ్ చేశారని ఆరోపిస్తూ ఫిర్యాదు చేశారు. దీనిపై స్పందించిన రంగారెడ్డి జిల్లా కోర్టు చంద్రబాబుపై ఎఫ్ఐఆర్ నమోదు చేయాలని చైతన్యపురి పోలీసులను అప్పుడే ఆదేశించింది. న్యాయవాది పిటిషన్ మేరకు మంగళవారం కోర్టు జోక్యంతో పోలీసులు 420 కేసు నమోదు చేశారు.

Published On November 8, 2011