గాలి కేసులో కెకె తనయుడికి నోటీసులు, కాటసానికీ

By Srinivas

Published: Tuesday, November 8, 2011, 8:58 [IST]

హైదరాబాద్: కర్నాటక మాజీ మంత్రి, భారతీయ జనతా పార్టీ సీనియర్ నేత గాలి జనార్ధన్ రెడ్డికి చెందిన ఓబుళాపురం గనుల కేసులో సెంట్రల్ బ్యూరో ఆఫ్ ఇన్వెస్టిగేషన్ సోమవారం మరికొందరికి నోటీసులు జారీ చేసింది. కాంగ్రెసు పార్టీ సీనియర్ నేత, రాజ్యసభ సభ్యుడు కె కేశవరావు తనయుడు విప్లవ కుమార్, కర్నూలు జిల్లాకు చెందిన కాంగ్రెసు సీనియర్ శాసనసభ్యుడ కాటసాని రాంభూపాల్ రెడ్డికి సిబిఐ తాఖీదులు జారీ చేసింది. కాగా సన్ ఇన్ ఫ్రా బాధ్యులను కూడా సిబిఐ విచారించే అవకాశముంది.

గాలి జనార్ధన్ రెడ్డి, శ్రీనివాస్ రెడ్డిలను స్పెషల్ క్లాస్ ఖైదీలుగా గుర్తించాలంటూ వేసిన పిటిషన్ నేడు(మంగళవారం) విచారణకు రానుంది. వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి ఇళ్లు, కార్యాలయాల్లో చేసిన సోదాల్లో స్వాధీనం చేసుకున్న డాక్యుమెంట్లు, పత్రాలు ఇవ్వాలని ఐటి శాఖ వేసిన పిల్ కూడా ఇవ్వాళే విచారణకు రానుంది.

కాగా గాలి గనుల కేసును సిబిఐ వేగవంతంగా కొనసాగిస్తోంది. గాలి అరెస్టు తర్వాత కర్నాటక, ఆంధ్ర ప్రదేశ్‌లలోని పలు మైనింగ్ కంపెనీలలో సోదాలు నిర్వహించింది. గాలి సన్నిహితులను విచారించింది. గాలి భార్య డైరెక్టర్‌గా ఉన్న కంపెనీ పైనా ఎఫ్ఐఆర్ నమోదు చేసినట్లు వార్తలు వచ్చాయి. ఇప్పటికే ఆస్తుల కేసు ఎదుర్కొంటున్న వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డిని సిబిఐ గాలి కేసులోనూ విచారించింది.

Published On November 8, 2011