దీనికంతా ప్రభుత్వమే కారణం: టిడిపి అధినేత బాబు

By Srinivas

Published: Tuesday, November 8, 2011, 16:52 [IST]

గుంటూరు: రాష్ట్రంలో కుంటుపడిన పరిశ్రమలు కోలుకోవాలంటే చాలా కష్టమని పరిశ్రమలు ఈ పరిస్థితికి రావడానికి కారణం కాంగ్రెసు ప్రభుత్వమేనని తెలుగుదేశం పార్టీ అధినేత నారా చంద్రబాబు నాయుడు మంగళవారం ధ్వజమెత్తారు. గుంటూరు జిల్లాలో చంద్రబాబు రైతు పోరు యాత్ర నిర్వహిస్తున్నారు. ఈ సందర్భంగా స్పిన్నింగ్ వ్యాపారులు, రైతులు తమ కష్ట నష్టాలను బాబుకు చెప్పుకున్నారు. ఇంపోర్టు, ఎక్స్‌పోర్టుపై ప్రభుత్వం సరియైన పద్ధతులు అవలంభించక పోవడం వల్లే నూలు పరిశ్రమకు ఇబ్బందులు ఎదురవుతున్నాయని విమర్శించారు. మీ సమస్యలను జాతీయ స్థాయిలో చర్చించే విధంగా కేంద్రం దృష్టికి తీసుకు వెళతానని చెప్పారు.

రైతులకు మేలు జరిగే వరకు తాను తన పోరాటాన్ని ఆపేది లేదన్నారు. తాను రైతుల కోసమే పాదయాత్ర చేస్తున్నానని చెప్పారు. చిలకలూరిపేట మండలంలోని కమ్మరిపాలెంలోని గ్రామ శివార్లలో అడుగంటిన మంచినీటి చెరువును ఆయన పరిశీలించారు. తాగునీటి కోసం నానా పాట్లు పడుతున్నా ప్రభుత్వం పట్టించుకోవడం లేదని స్థానికులు చెప్పడంతో బాబు ప్రభుత్వం, అధికారుల తీరుపై తీవ్రస్థాయిలో మండిపడ్డారు.

Published On November 8, 2011