తెలంగాణపై నిర్ణయం ఇప్పట్లో వెలువడుతుందా?

హైదరాబాద్: బక్రీద్ పర్వదినం తర్వాత తెలంగాణపై నిర్ణయం వెలువడుతుందని కేంద్ర హోం మంత్రి పి. చిదంబరం చెప్పారు. తెలంగాణపై ఏ క్షణంలోనైనా నిర్ణయం రావచ్చునని పిసిసి అధ్యక్షుడు బొత్స సత్యనారాయణ హైదరాబాదులో చెప్పారు. అయితే, తెలంగాణపై ఇప్పుడిప్పుడే నిర్ణయం వస్తుందని ఎవరూ అనుకోవడం లేదు. కాంగ్రెసు అధిష్టానం వ్యవహారశైలి వల్లనే ఆ నమ్మకం కుదరడం లేదు. తెలంగాణపై పార్టీకి చెందిన రాష్ట్ర నాయకులతో కాంగ్రెసు రాష్ట్ర వ్యవహారాల ఇంచార్జీ గులాం నబీ ఆజాద్ చర్చలు ముగించిన తర్వాత కదలిక ఆగిపోయినట్లు కనిపిస్తోంది. వరుస పర్వదినాల వల్లనే కాస్తా ఆలస్యం జరిగిందని చిదంబరం ఇటీవల అన్నారు. గులాం నబీ ఆజాద్ ఆదివారం ఢిల్లీకి తిరిగి వచ్చారు. అయితే, బక్రీద్ పర్వదినం కూడా ముగియడంతో తెలంగాణపై నిర్ణయం వస్తుందా అనే ఆసక్తి కూడా లేని పరిస్థితి ఉంది.

తెలంగాణపై నిర్ణయాన్ని కాంగ్రెసు నాయకత్వం వాయిదాల మీద వాయిదాలు వేస్తూ పోతోంది. వచ్చే 2014 ఎన్నికల వరకు కాంగ్రెసు అధిష్టానం తెలంగాణపై నిర్ణయాన్ని వాయిదా వేయడానికే సిద్ధపడినట్లు తెలుస్తోంది. అందుకే, ఎక్కడా నిర్ణయానికి సంబంధించిన ఉత్కంఠ లేదు. ఏ విధమైన హామీ ఇచ్చి మాజీ మంత్రి కోమటిరెడ్డి వెంకటరెడ్డి ఆమరణ నిరాహార దీక్షను విరమింపజేస్తారనేదే ఇప్పుడు ఆసక్తిగా మారిన విషయం. అసలు తెలంగాణపై కేంద్ర ప్రభుత్వం ప్రకటన చేస్తుందా, కాంగ్రెసు అధిష్టానం చేస్తుందా అనే స్పష్టత కూడా లేదు. జనవరిలోగా తెలంగాణపై నిర్ణయం వెలువడుతుందని ఇటీవల ఎఐసిసి అధికార ప్రతినిధి అభిషేక్ మను సింఘ్వీ అన్నారు. ఉత్తరప్రదేశ్ ఎన్నికలు కూడా తెలంగాణపై నిర్ణయానికి ఆటంకంగా కాంగ్రెసు అధిష్టాన చూపవచ్చునని అంటున్నారు. అలాగే, జనవరి 16వ తేదీన సంక్రాంతి పర్వదినం, జనవరి 26వ తేదీన గణతంత్ర దినోత్సవం ఉంటాయి. ఇలా ఏదో ఒకటి వస్తూనే ఉంటుంది, పోతూనే ఉంటుంది. వాటి పేరు చెప్పి కాంగ్రెసు అధిష్టానం తెలంగాణపై నిర్ణయాన్ని వాయిదాలు వేస్తూనే పోతుందని అంటున్నారు. తెలంగాణపై ఇటీవలి కాలంలో ఓ నిర్ణయం వస్తే అది వింత మాత్రమే అవుతుందనే వ్యాఖ్య వినిపిస్తోంది.

English summary

It is said that Congress high command may not announce decision on Telangana at present.