తెలంగాణపై కాంగ్రెసు మోసం చేస్తోంది: కోదండరామ్

By Pratap

Published: Tuesday, November 22, 2011, 18:54 [IST]

హైదరాబాద్: తెలంగాణపై కాంగ్రెసు పార్టీ రకరకాల ప్రకటనలతో మోసం చేస్తోందని తెలంగాణ రాజకీయ ఐక్య కార్యాచరణ సమితి (జెఎసి) చైర్మన్ ఆచార్య కోదండరాం మంగళవారం విమర్శించారు. పార్టీలన్నీ ప్రజల ఆకాంక్షను గుర్తించి తెలంగాణకు అనుకూలంగా నిర్ణయం తీసుకోవాలని విజ్ఞప్తి చేశారు. యుపిఏప్రభుత్వం ఈ పార్లమెంటు సమావేశాలలోనే ప్రత్యేక రాష్ట్రంపై స్పష్టమైన ప్రకటన చేయాలని ఆయన మీడియా ప్రతినిధులతో అన్నారు. పార్లమెంటులో తెలంగాణ ప్రాంత కాంగ్రెసు ఎంపీల నిరసన అభినందనీయమన్నారు.

పార్లమెంటు సభ్యులు మరింతబాగా ప్రజల కోరికను వినిపించాలన్నారు. స్వతంత్ర సమర యోధుడు కొండా లక్ష్మణ్ బాపూజీసత్యాగ్రహంపై బుధవారం జరిగే జెఎసి సమావేశంలో చర్చించి నిర్ణయం తీసుకుంటామన్నారు. రాష్ట్రంలో పార్టీలన్నీ యుపి ముఖ్యమంత్రి మాయావతి మార్గంలో నడవాలన్నారు. తెలంగాణపై కాంగ్రెసు, యుపిఎ 2004 నుంచి ఇస్తున్న హామీలను దాట వేస్తూ వస్తున్నాయని ఆయన విమర్శించారు.

ఆంధ్ర భవన్‌లో ఏర్పాటు చేసిన విందుకు స్వాతంత్ర్య సమరయోధుడు కొండా లక్ష్మణ్ బాపూజీ ఫోన్ చేసి తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావును ఆహ్వానించారు ఇండియా గేట్ వరకు తెలంగాణ కోసం చేపట్టే సత్యాగ్రహంలో పాల్గొనాలని ఆయన కెసిఆర్‌ను కోరారు.

Published On November 22, 2011