పార్లమెంటులో నోరు మెదపరు: కాంగ్రెస్ ఎంపీలపై నామా

By Srinivas

Published: Thursday, February 9, 2012, 12:38 [IST]

హైదరాబాద్: కాంగ్రెసు తరఫున 32 మంది పార్లమెంటు సభ్యులు, ఆరుగురు మంత్రులు రాష్ట్రం నుండి ఉన్నప్పటికీ ఒరిగేదేమీ లేదని తెలుగుదేశం పార్లమెంటు సభ్యుడు నామా నాగేశ్వర రావు గురువారం ధ్వజమెత్తారు. ఆయన తెలుగుదేశం పార్టీ కార్యాలయం ఎన్టీఆర్ భవనంలో విలేకరుల ఏర్పాటు చేశారు. రైల్వే ప్రాజెక్టుల్లో రాష్ట్రానికి ప్రతిసారి అన్యాయం జరుగుతోందని ఆయన ఆవేదన వ్యక్తం చేశారు. ముఖ్యమంత్రి కిరణ్ కుమార్ రెడ్డి సమావేశాలు కంటి తుడుపు చర్యలన్నారు. అందుకే తాము సిఎం సమావేశానికి వెళ్లలేదన్నారు. రాష్ట్ర ప్రభుత్వానికి చిత్తశుద్ధి ఉంటే పెండింగ్ రైల్వే ప్రాజెక్టులపై కేంద్రంపై ఒత్తిడి తీసుకు రావాలని డిమాండ్ చేశారు. రాష్ట్రానికి ఇంతగా అన్యాయం జరుగుతున్నప్పటికీ రాష్ట్రానికి చెందిన ఆ పార్టీ ఎంపీలు, మంత్రులు నోరు మెదపరన్నారు. వారి వల్ల ఎలాంటి ఉపయోగం లేదన్నారు.

రాబోయే పార్లమెంటు సమావేశాల్లో పెండింగ్ ప్రాజెక్టులపై కేంద్రంపై తెలుగుదేశం పార్టీ తరఫున ఒత్తిడి తీసుకు వస్తామన్నారు. కేంద్ర ప్రభుత్వం రాష్ట్రంలోని పార్లమెంటు సభ్యులపై ఆధారపడి నడుస్తుంటే వీరు మాత్రం తీసుకు రావాల్సిన ప్రాజెక్టులు తీసుకు రావడం లేదన్నారు. రాష్ట్ర సమస్యలపై ఏమాత్రం స్పందించడం లేదని దుయ్యబట్టారు. రైల్వే ప్రాజెక్టుల కోసం ఆ శాఖ నిధులు కేటాయించినా రాష్ట్రం తన వాటా కేటాయించలేదని ఆరోపించారు. కాగా రాష్ట్రంలోని పెండింగ్ రైల్వే ప్రాజెక్టులపై ముఖ్యమంత్రి కిరణ్ ఆధ్వర్యంలో జరిగిన సమావేశానికి టిడిపి ఎంపీలు గైర్హాజరయ్యారు.

Published On February 9, 2012