వైయస్ జగన్ కుమ్మక్కు వ్యాఖ్యల వ్యూహం ఫలిస్తోందా?

By Pratap

Published: Friday, February 10, 2012, 19:49 [IST]

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడు ముఖ్యమంత్రి కిరణ్ కుమార్ రెడ్డితో, కాంగ్రెసుతో కుమ్మక్కయ్యారనే వైయస్సార్ కాంగ్రెసు పార్టీ అధ్యక్షుడు వైయస్ జగన్ ప్రచార వ్యూహం ఫలిస్తున్న సూచనలు కనిపిస్తున్నాయని రాజకీయ విశ్లేషకులు అంటున్నారు. కాంగ్రెసుతో కుమ్మక్కు కావడం వల్లనే చంద్రబాబుపై సిబిఐ దర్యాప్తు చేయడం లేదని ఆయన చెబుతున్నారు. దర్యాప్తు మాట అలా ఉంచితే కిరణ్ కుమార్ రెడ్డితో చంద్రబాబు కుమ్మక్కయ్యారనే జగన్, ఆయన పార్టీ నేతల ప్రచారం మాత్రం పనిచేస్తున్నట్లే కనిపిస్తోంది. చంద్రబాబు కాంగ్రెసుతో కుమ్మక్కయ్యారంటూ వైయస్సార్ కాంగ్రెసు నాయకులు ప్రతి రోజూ మీడియా ప్రతినిధుల సమావేశం పెట్టి ప్రచారం చేస్తున్నారు. మంత్రి డిఎల్ రవీంద్రా రెడ్డి వ్యాఖ్యలతో వారి ప్రచారానికి బలం చేకూరినట్లయింది. సమాచార కమిషనర్ల నియామకం విషయంలో చంద్రబాబు ఓ ఉన్నత స్థాయి వ్యక్తి కుమ్మక్కయ్యారని డిఎల్ రవీంద్రా రెడ్డి వ్యాఖ్యానించారు. ఆ ఉన్నత స్థాయి వ్యక్తి కిరణ్ కుమార్ రెడ్డేనని వేరుగా చెప్పాల్సిన అవసరం లేదు.

చంద్రబాబు కిరణ్ కుమార్ రెడ్డితో కుమ్మక్కయ్యారని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు కూడా అంటున్నారు. అందుకు ఆయన మరో నిదర్శనాన్ని చూపిస్తున్నారు. కిరణ్ కుమార్ రెడ్డి పట్టుబట్టి ఐదు వేల మంది సిబ్బందితో భద్రత కల్పించి ఉండకపోతే చంద్రబాబు వరంగల్ జిల్లాలో పర్యటించి ఉండేవారు కాదని ఆయన అంటున్నారు. కనీవినీ ఎరుగుని రీతిలో చంద్రబాబు పర్యటనకు భద్రత కల్పించడమే కుమ్మక్కు నిదర్సనమని ఆయన అంటున్నారు. నిజామాబాద్ జిల్లా బాన్సువాడ శాసనసభ ఉప ఎన్నికలో తమ పార్టీ ఓట్లన్నీ కాంగ్రెసుకు వేయించారని, ఇది కూడా చంద్రబాబు కిరణ్ కుమార్ రెడ్డితో కుమ్మక్కయ్యారని చెప్పడానికి నిదర్శనమని ఆయన అన్నారు. పదవిని కాపాడుకోవడానికి కిరణ్ కుమార్ రెడ్డి చంద్రబాబుతో కుమ్మక్కయ్యారనే విమర్సలు కూడా వస్తున్నాయి.

ఇక, వైయస్ జగన్‌పై పోరాటం చేస్తున్నందుకే పి. శంకరరావును మంత్రి వర్గం నుంచి తొలగించారని, డిఎల్ రవీంద్రా రెడ్డికి ప్రాధాన్యం లేకుండా చేశారని ముఖ్యమంత్రిపై విమర్శలు వస్తున్నాయి. జగన్ పట్ల మెతక వైఖరి అవలంబించాలని కాంగ్రెసు పార్టీ అధిష్టానం మేరకే కిరణ్ కుమార్ రెడ్డి వ్యవహరిస్తున్నారనే ప్రచారం కూడా పెద్ద యెత్తునే సాగుతోంది. కిరణ్ కుమామర్ రెడ్డికి ఇటువంటి ప్రచారాలు తీవ్రమైన వ్యతిరేకతగా పరిణమించవచ్చునని అంటున్నారు. ఈ రకంగా వైయస్ జగన్ వ్యూహం ఫలించి, వైయస్సార్ కాంగ్రెసు పార్టీ బలపడుతుందని అంటున్నారు.

Published On February 10, 2012