బీహార్‌లో పడవ మునక: పలువురి మృతి, గాలింపు

పాట్నా: బీహార్‌లో పడవ మునిగి ఆరుగురు మృతి చెందగా మరో ఇరవై మంది వరకు గల్లంతయ్యారు. బోజ్‌పూర్ జిల్లాలోని కౌర్ సమీపంలోని సోన్ నదిలో సోమవారం ఉదయం పడవ బోల్తా పడింది. పడవలో సామర్థ్యానికి మించి ప్రయాణీకులు ఉండటం వల్లే ఈ ప్రమాదం జరిగింది. ఈ పడవ సామర్థ్యం 14 అయినప్పటికీ నలభై మంది వరకు కూర్చున్నారు. ప్రమాదం జరిగిన కౌర్ జిల్లా రాష్ట్ర రాజధాని పాట్నాకు డెబ్బై కిలోమీటర్ల దూరంలో ఉంది.

పడవ మునగగానే ఆరేడు మంది ప్రయాణీకులు ఈదుకుంటూ బయటకు సురక్షితంగా వచ్చారు. మరికొందరిని స్థానికులు రక్షించారు. విషయం తెలుసుకున్న అధికారులు వెంటనే అక్కడకు చేరుకొని గాలింపు చర్యలు చేపట్టారు. ఇప్పటి వరకు ఆరు మృతదేహాలను వెలికి తీశారు. మరో ఇరవై మంది వరకు నీటిలోనే ఉన్నట్లు అనుమానిస్తున్నారు.

స్థానికులు వెంటనే అప్రమత్తమై పలువురిని రక్షించారని, ఇప్పటి వరకు పలు మృతదేహాలు బయటకు తీశామని, ఈ సంఖ్య పెరిగే అవకాశముందని భోజ్‌పుర్ పోలీసు సూపరింటెండెంట్ ఎస్ఆర్ నాయక్ చెప్పారు. ఆరు మృతదేహాలన్ని తీశామని, గాలింపు చర్యలు చేపడుతున్నామని జిల్లా అడ్మినిస్ట్రేషన్ అధికారి చెప్పారు.

పక్కనే ఉన్న అర్వాల్ జిల్లాలోని ఓ విలేజ్ ఫేయిర్‌కు వెళ్లి తిరిగి వస్తుండగా ఈ ప్రమాదం చోటు చేసుకుంది. మృతి చెందిన ఆరుగురిలో ఇద్దరు పిల్లలు, ఇద్దరు మహిళలు ఉన్నారు.

English summary

At least six people, including two children and two women, drowned and nearly 20 people were missing after an overcrowded boat capsized in the Sone river in Bihar's Bhojpur district early Monday, police said.