జగన్ కేసు: మంత్రులకు, అధికారులకు సుప్రీం డెడ్‌లైన్

న్యూఢిల్లీ: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి ఆస్తుల కేసుకు సంబంధించి వివాదాస్పద 26 జివోల కేసులో మంత్రులకు, ఐఏఎస్ అధికారులకు భారత అత్యున్నత న్యాయస్థానం సుప్రీం కోర్టు డెడ్ లైన్ విధించింది. జగన్ ఆస్తుల కేసుకు సంబంధించి 26 జివోల విడుదల విషయంలో సుప్రీం కోర్టు మంత్రులు సబితా ఇంద్రా రెడ్డి, గీతా రెడ్డి, ధర్మాన ప్రసాద రావు, పొన్నాల లక్ష్మయ్య, మాజీ మంత్రి మోపిదేవి వెంకటరమణలకు నోటీసులు జారీ చేసిన విషయం తెలిసిందే.

కౌంటర్ దాఖలు చేయాలని వారిని ఆదేశించింది. కానీ ఇప్పటి వరకు ఐఏఎస్ అధికారిణి రత్నప్రభ మాత్రమే కౌంటర్ దాఖలు చేశారు. దీంతో సుప్రీం కోర్టు మంగళవారం మంత్రులకు, అధికారులకు సుప్రీం కౌంటర్ దాఖలుపై డెడ్ లైన్ విధించింది. డిసెంబర్ 3వ తేదీలోగా దాఖలు చేయాలని ఆదేశించింది. సుప్రీంకోర్టు ఆదేశాలకు సంబంధించి నోటీసులను స్వయంగా అందజేస్తానని న్యాయవాది సుధాకర్ రెడ్డి కోర్టుకు విజ్ఞప్తి చేయడంతో కోర్టు కూడా అంగీకరించింది.

శ్రీపొట్టి శ్రీరాములు నెల్లూరు జిల్లాకు చెందిన న్యాయవాది సుధాకర్ రెడ్డి వివాదాస్పద 26 జివోలకు సంబంధించి సంబంధిత మంత్రులను కూడా విచారించాలని గతంలో సుప్రీం కోర్టును ఆశ్రయించిన విషయం తెలిసిందే. ఇందుకు సంబంధించి ఆరుగురు మంత్రులకు నోటీసులు జారీ చేసింది. మాజీ మంత్రి మోపిదేవి వెంకటరమణ ఇప్పటికే జైలులో ఉన్నారు. మరో మంత్రి ధర్మాన ప్రసాద రావు రాజీనామా ముఖ్యమంత్రి కిరణ్ కుమార్ రెడ్డి వద్ద పెండింగ్‌లో ఉంది.

English summary

Supreme Court has put deadline to Andhra Pradesh six ministers, who were served notices from SC in YSR Congress party chief YS Jaganmohan Reddy's DA case.