కాంగ్రెస్‌కు షాక్: జగన్ పార్టీలోకి ఇంద్రకరణ్ రెడ్డి, కోనేరు

అదిలాబాద్: జిల్లా కాంగ్రెసు పార్టీ సీనియర్ నేత ఇంద్రకరణ్ రెడ్డి పార్టీకి గుడ్‌బై చెప్పారు. ఆయన గురువారం మధ్యాహ్నం రాష్ట్ర పార్టీ అధ్యక్షుడు బొత్స సత్యనారాయణకు తన రాజీనామా లేఖను ఫ్యాక్స్ ద్వారా పంపించారు. ఇంద్రకరణ్ రెడ్డితో పాటు జిల్లాకు చెందిన మరో నేత కోనేరు కొనప్ప కూడా వైయస్సార్ కాంగ్రెసు పార్టీలో చేరేందుకు సిద్ధమయ్యారు. వీరిద్దరు త్వరలో వైయస్సార్ కాంగ్రెసు పార్టీ గౌరవ అధ్యక్షురాలు వైయస్ విజయమ్మ సమక్షంలో చేరనున్నారు.

ఇంద్రకరణ్ రెడ్డి కాంగ్రెసుకు గుడ్ బై చెప్పడం అదిలాబాద్ జిల్లాలో కాంగ్రెసు పార్టీకి గట్టి ఎదురు దెబ్బే అని చెప్పవచ్చు. జిల్లాలో ఇంద్రకరణ్‌కు మంచి పట్టు ఉంది. ఈయనతో పాటు ఈయన అనుచరులు, పలువురు పార్టీ నేతలు, కార్యకర్తలు కూడా జగన్ పార్టీలో చేరనున్నారని తెలుస్తోంది. పార్టీ సభ్యత్వ నమోదు కార్యక్రమం ప్రారంభమైన రోజే కాంగ్రెసు పార్టీకి అదిలాబాదులో ఎదురు దెబ్బ తలగడం గమనార్హం.

ప్రధానంగా తెలంగాణ అంశంపై కాంగ్రెసు పార్టీ అధిష్టానం నుండి ఎలాంటి నిర్ణయం రాకపోవడంతో ఇంద్రకరణ్ రెడ్డి పూర్తి అసంతృప్తితో ఉన్నట్లుగా తెలుస్తోంది. ఈ విషయమై ఆయన పలుమార్లు తన వర్గం నేతలు, కార్యకర్తలతో అత్యవసర సమావేశం ఏర్పాటు చేసినట్లుగా తెలుస్తోంది. కాంగ్రెసు పార్టీలో ఉండాలా ఉండకూడదా, పార్టీ వీడితే ఏ పార్టీలో చేరితే కలిసి వస్తుందనే అంశంపై ఇంద్రకరణ్ రెడ్డి వారిని అడిగిన తర్వాతనే కాంగ్రెసుకు గుడ్ బై చెప్పారని, జగన్ పార్టీలో చేరేందుకు సిద్ధమవుతున్నారని తెలుస్తోంది.

రాజీనామా పిసిసి చీఫ్ బొత్సకు పంపించిన అనంతరం ఇంద్ర కరణ్ రెడ్డి మాట్లాడుతూ... తాను ఇక ప్రజా సమస్యలపై పోరాటం చేస్తానని చెప్పారు.

English summary

Adilabad district former MP Indrakaran Reddy resigned to Congress party and party posts on Thursday. He is ready to join in Kadapa MP YS Jaganmohan Reddy's YSR Congress Party soon.