24 వేల జాబ్స్ ఊస్ట్.. సాఫ్ట్‌వేర్ ఉద్యోగులకు ఊహించని షాక్..
ఒకప్పుడు సాఫ్ట్‌వేర్ ఉద్యోగం అంటే తిరుగులేని భవిష్యత్తు, నిరంతర నియామకాలకు కేరాఫ్ అడ్రస్. కానీ, ప్రస్తుతం దేశీయ ఐటీ దిగ్గజ సంస్థల్లో పరిస్థితులు వేగంగా మారిపోతున్నాయి. కంపెనీల నుంచి బయటకు వెళ్లే ఉద్యోగుల సంఖ్యతో పోలిస్తే, కొత్తగా లోపలికి వచ్చే వారి సంఖ్య తీవ్రంగా పడిపోయింది. గత ఏడాది కాలంలో భారతదేశానికి చెందిన ప్రముఖ టెక్నాలజీ సేవల సంస్థలు ఐటీ, ఇంజనీరింగ్ విభాగాల్లో కొత్త నియామకాలను భారీగా తగ్గించేశాయి. ఫలఫలితంగా, గడిచిన 12 నెలల కాలంలోనే ఏకంగా 24,000 కంటే ఎక్కువ ఉద్యోగాలు తగ్గిపోయినట్లు విశ్లేషణలు వెల్లడిస్తున్నాయి.
వెళ్ళేవారు ఎక్కువ.. వచ్చేవారు తక్కువ!
దేశంలోని టాప్ టెక్ దిగ్గజాలైన టీసీఎస్, ఇన్ఫోసిస్, హెచ్‌సీఎల్ టెక్, విప్రో, టెక్ మహీంద్రా, ఎల్‌టీఐ మైండ్‌ట్రీ సంస్థల్లో సాధారణంగా జరిగే ఉద్యోగుల రాజీనామాలు 11 నుంచి 15 శాతంగానే ఉన్నాయి. ఈ క్రమంలో గడిచిన ఏడాదిలో దాదాపు 92,000 మంది ఉద్యోగులు ఈ కంపెనీల నుంచి బయటకు వెళ్లారు. కానీ, ఖాళీ అయిన స్థానాలను భర్తీ చేయడంలో కంపెనీలు వెనకడుగు వేశాయి. కేవలం 68,000 మందిని మాత్రమే కొత్తగా రిక్రూట్ చేసుకోవడంతో, నికరంగా నియామకాల సంఖ్య బాగా క్షీణించింది. ఐటీ హెడ్‌కౌంట్ క్రమంగా తగ్గుముఖం పట్టడానికి ఇదే ప్రధాన కారణమైంది.
ఆర్టిఫిషియల్ ఇంటెలిజెన్స్ ప్రభావం
సంప్రదాయ ఐటీ ఉద్యోగాలపై ఆర్టిఫిషియల్ ఇంటెలిజెన్స్ ప్రభావం స్పష్టంగా కనిపిస్తోంది. కోడింగ్, మ్యాన్యువల్ టెస్టింగ్, ఇన్‌ఫ్రాస్ట్రక్చర్ సపోర్ట్, అప్లికేషన్ మెయింటెనెన్స్ వంటి సాధారణ, రొటీన్ పనులను ఇప్పుడు ఏఐ టూల్స్ వేగంగా పూర్తి చేస్తున్నాయి. ముఖ్యంగా 5 నుంచి 12 సంవత్సరాల అనుభవం ఉన్న ఉద్యోగులకు డిమాండ్ తగ్గి, లేఆఫ్స్ పెరిగాయి. కంపెనీలు కూడా ఉన్న ఉద్యోగులకే ఏఐ స్కిల్స్ అప్‌స్కిల్లింగ్, తక్కువ మందితో ఎక్కువ పని పూర్తి చేసుకునేందుకు మొగ్గు చూపుతున్నాయి.
కొత్త నైపుణ్యాలకు భారీ డిమాండ్
ఒకవైపు సంప్రదాయ ఐటీ ఉద్యోగాలు తగ్గుతున్నప్పటికీ, సరికొత్త సాంకేతికత కలిగిన వారికి మాత్రం మార్కెట్లో భలే డిమాండ్ ఉంది. ఆర్టిఫిషియల్ ఇంటెలిజెన్స్, క్లౌడ్ కంప్యూటింగ్, సైబర్ సెక్యూరిటీ, స్పెషలైజ్డ్ ఇంజనీరింగ్ విభాగాల్లో ఉద్యోగ అవకాశాలు ఏడాదికి 16 శాతం చొప్పున పెరుగుతున్నాయి. అయితే పాత తరహా ఉద్యోగాలు కోల్పోతున్న వారికి ఈ కొత్త టెక్నాలజీలలో తగిన నైపుణ్యాలు లేకపోవడమే పెద్ద సమస్యగా మారింది. మరొకవైపు గ్లోబల్ మార్కెట్లలో క్లయింట్ల నుంచి ప్రాజెక్టులు తగ్గడంతో, బెంచ్ స్టాఫ్ సంఖ్యను కూడా కంపెనీలు తగ్గించుకుంటున్నాయి.
కోలుకునే దిశగా అడుగులు
ఈ ఉద్యోగాల కోత శాశ్వతం కాదని, ఇది కేవలం తాత్కాలిక సవరణ దశ మాత్రమేనని మార్కెట్ విశ్లేషకులు చెబుతున్నారు. ప్రపంచ ఆర్థిక పరిస్థితులు చక్రం తిప్పి, టెక్ రంగానికి మళ్లీ ప్రాజెక్టుల రాక పెరిగితే రిక్రూట్‌మెంట్‌లు పూర్వ వైభవాన్ని సంతరించుకుంటాయి. ఇప్పటికే కొన్ని దిగ్గజ సంస్థలు సెప్టెంబర్ త్రైమాసికంలో కొత్త రిక్రూట్‌మెంట్‌లను పునరుద్ధరించడం ఐటీ అభ్యర్థులకు కొంత ఊరటనిచ్చే అంశం.
Click it and Unblock the Notifications
Sign in with Google
