TCS Layoff: 14 ఏళ్ల సీనియర్ తో ఇంత దారుణంగానా ..! లేఆఫ్స్ పై ఉద్యోగి షాకింగ్..!

టాటా కన్సల్టెన్సీ సర్వీసెస్ (టీసీఎస్)లో ఆటో మేషన్, తాజా పరిణామాల నేపథ్యంలో ఏకంగా 12 వేల మంది ఉద్యోగుల్ని తొలగించాలన్న నిర్ణయం తీవ్ర సంచలనాలు రేపుతోంది. ఇప్పటికే టీసీఎస్ నిర్ణయంపై ఉద్యోగులు తీవ్ర ఆగ్రహం వ్యక్తం చేస్తున్నారు. తమ తోటి ఉద్యోగులకు అన్యాయం చేశారన్న బాధతో ఉన్నారు. దీంతో పలు చోట్ల టీసీఎస్ కార్యాలయాల వద్ద నిరసనలు కూడా జరుగుతున్నాయి.

ఈ నేపథ్యంలో ఉద్యోగుల నిరసనలపై స్పందించిన టీసీఎస్ యాజమాన్యం.. లేఆఫ్స్ ద్వారా తొలగించిన ఉద్యోగులకు అన్నివిధాలా అండగా నిలుస్తామని, వారికి ఇవ్వాల్సిన పరిహారం ఇవ్వడంతో పాటు భవిష్యత్తులోనూ ఉద్యోగాలు సంపాదించుకోవడానికి అవసరమైన కౌన్సెలింగ్ కూడా ఇప్పిస్తామని వెల్లడించింది. అయితే ఎప్పటిలోగా అమలు చేస్తుందో తెలియదు కానీ ఆ లోపే ఇప్పటికే తొలగించిన ఉద్యోగులకు అండగా ప్రస్తుత ఉద్యోగులు సోషల్ మీడియాకు ఎక్కుతున్నారు.

తాజాగా టీసీఎస్ లో పనిచేస్తున్న ఓ ఉద్యోగి తన మేనేజర్ ను కంపెనీ నుంచి ఎంత దారుణంగా సాగనంపారో వివరిస్తూ రెడ్డిట్ లో ఓ పోస్టు పెట్టారు. 14 ఏళ్ల అనుభవం ఉన్న సదరు మేనేజర్ ను ఎలాంటి సేవేరెన్స్ పే ఇవ్వకుండానే తక్షణం బలవంతంగా రాజీనామా చేయించారని అతను ఈ పోస్టులో వాపోయాడు. కార్యాలయ విషప్రభావం అని గుర్తించబడిన ఆ పోస్ట్ లోమేనేజర్ , అతని టీమ్ కు ఒక అమెరికన్ క్లయింట్ కోసం ఒక కొత్త ప్రాజెక్ట్ కేటాయించారని వివరించారు.

సదరు మేనేజర్ క్లయింట్ కోసం ఐబీఎం సిస్టమ్‌లలో ఆధునికీకరణ అవసరమయ్యే 15 అప్లికేషన్‌లను నిర్మించాడని, అవన్నీ ఇప్పుడు ఆగిపోయాయన్నారు. కానీ ప్రాజెక్ట్ ప్రారంభమైన తర్వాత మొదటి నుండి ప్రతిదీ తిరిగి రాయకుండా వాస్తవ ఆధునీకరణ సాధ్యం కాదని టీమ్ తేల్చేసింది. ఈ వ్యవస్థలు గట్టిగా అనుసంధానించబడి ఉన్నాయని, పాతవి, ఆధునిక మౌలిక సదుపాయాలపై అమలు చేయడం అసాధ్యమని తెలిపారు. తమ యాజమాన్యానికి ఈ లోపాల గురించి తెలుసన్నారు. అయినా రాత్రికి రాత్రి తమ టీమ్ ను 10కి పెంచి నెలలోపు 15 అప్లికేషన్స్ ను అప్ గ్రేడ్ చేయాలని టార్గెట్ పెట్టారన్నారు. దీంతో క్లయింట్ నుంచి ఒత్తిడి పెరుగుతోందన్నాడు.

తమ మేనేజర్ ను పేలవమైన పనితీరు, అసమర్థత కారణాలు చూపి తప్పించారన్నారు. ఆ ప్రాజెక్ట్ బిల్లింగ్‌ను జనరేట్ చేయకపోవడంతో, అతన్ని బిల్లు వేయలేని వనరుగా పరిగణించారన్నారు. రాజీనామా చేసే ఉద్యోగులకు టీసీఎస్ లో 3 నెలల నోటీసు పిరియడ్ నిబంధన ఉన్నా, వెంటనే ఎలాంటి చెల్లింపు చేయకుండా తక్షణం రాజీనామా చేయించి పంపేశారన్నారు. మీరు రాజీనామా చేస్తారా లేక మమ్మల్ని టెర్మినేట్ చేయమంటారా అని హెచ్ ఆర్ బెదిరిస్తున్నారని, టెర్మినేట్ చేస్తే మరో ఉద్యోగం దొరకడం కూడా కష్టమన్నారు.