ఈ నెల 15 నుంచి అశుభ దినాలు ప్రారంభం- చేయకూడని కార్యక్రమాలు
హిందూ పంచాంగం ప్రకారం ఖర్మాస్ కాలానికి (సూర్యుడి సంక్రాంతి సమయంలో ఏర్పడే అశుభ కాలం) ఎంతో ప్రాముఖ్యత ఉంది. ఈ సమయంలో ఎలాంటి శుభకార్యాలు, మంగళకర కార్యక్రమాలు చేయరాదని చెబుతారు. కొత్త పనులు ప్రారంభించడం, వివాహాలు, గృహ ప్రవేశాలు, కేశఖండనం. ఉపనయనం వంటి సంస్కారాలు ఖర్మాస్ సమయంలో చేయకూడదు. ఈ కాలంలో శుభకార్యాలు చేపడితే వాటికి ఆటంకాలు ఎదురవుతాయని, ఆశించిన ఫలితాలు లభించవని నమ్మకం.
ఈసంవత్సరంలో మొదటి ఖర్మాస్ ఆరంభం కానున్న నేపథ్యంలో, దాని తేదీలు, వ్యవధి, చేయకూడని పనుల గురించి ఇప్పుడు తెలుసుకుందాం. జ్యోతిష్య గణనల ప్రకారం, సూర్యుడు మీనరాశిలోకి ప్రవేశించినప్పుడు ఖర్మాస్ మొదలవుతుంది. ఈ నెల 14వ తేదీ రాత్రి సూర్యుడు మీనరాశిలోకి ప్రవేశిస్తాడు. ఈ కారణంగా 15వ తేదీ నుండి ఖర్మాస్ ప్రారంభమవుతుంది. దాదాపు 30 రోజుల పాటు కొనసాగుతుంది.
ఏప్రిల్ 14న సూర్యుడు మేషరాశిలోకి ప్రవేశించడంతో ఖర్మాస్ అంతమవుతుంది. మార్చి 15 నుండి ఏప్రిల్ 14 వరకు ఈ ఖర్మాస్ కొనసాగుతుంది. ఈ మధ్య కాలాన్ని అశుభ దినాలుగా పరిగణిస్తారు. ఎటువంటి శుభ ముహూర్తాలూ ఉండవు. అందుకే ఈ మొత్తం కాలంలో అన్ని మంగళ కార్యాలను వాయిదా వేయడం ఆనవాయితీ. ఖర్మాస్ కాలంలో తప్పనిసరిగా చేయకూడని అయిదు ప్రధాన పనులను ఇప్పుడు చూద్దాం.
ఖర్మాస్ సమయంలో ఈ పనులు చేయడం వల్ల కార్యాల్లో ఆటంకాలు, ఆర్థిక నష్టం లేదా కుటుంబ కలహాలు పెరిగే అవకాశం ఉంది. కొత్త వ్యాపారం, దుకాణం, ప్రాజెక్ట్ లేదా కొత్త ఉద్యోగం వంటి ఏ కొత్త పనులనూ ఈ కాలంలో ప్రారంభించకూడదు. అలాగే, కొత్త ఇంట్లోకి ప్రవేశించడం లేదా గృహ ప్రవేశ పూజలు వంటివి ఖర్మాస్ ముగిసిన తర్వాతే చేయాలి. వివాహాలు, నిశ్చితార్థాలు లేదా కొత్త సంబంధాలను ఈ సమయంలో ప్రారంభించడాన్ని నిషిద్ధంగా భావిస్తారు.
కేశఖండనం, ఉపనయనం, నామకరణం, అన్నప్రాశన వంటి శుభ సంస్కారాలను కూడా ఖర్మాస్ పూర్తయ్యే వరకు వాయిదా వేసుకోవాలి. కొత్త ఆస్తులు, వాహనాలు, భారీ యంత్రాలు లేదా ఖరీదైన వస్తువులను ఈ 30 రోజుల్లో కొనుగోలు చేయరాదు.జ్యోతిష్యం ప్రకారం ఈ కాలంలో గ్రహ స్థితులు అస్థిరంగా ఉంటాయి. అందుకే శుభకార్యాల్లో ఆటంకాలు ఎదురవుతాయి.
ఖర్మాస్ కాలంలో శుభకార్యాలు నిషిద్ధమైనా, కొన్ని పనులను చేయడం వల్ల ప్రత్యేక ప్రయోజనాలు లభిస్తాయి. ప్రతిరోజూ సూర్య భగవానుడికి జలార్ఘ్యం ఇవ్వడం మంచిది. విష్ణు సహస్రనామం, రామ రక్షా స్తోత్రం లేదా హనుమాన్ చాలీసా వంటి వాటిని పారాయణం చేయవచ్చు. ఈ సమయంలో దానధర్మాలు చేయడం, తీర్థయాత్రలు, వ్రతాలు, జపతపాలు నిర్వహించడం విశేష ఫలప్రదం. ఇంటిని పరిశుభ్రంగా ఉంచుకోవాలి, ప్రతికూల ఆలోచనలకు దూరంగా ఉండాలి.
పాత అప్పులు తీర్చుకోవడానికి లేదా పెండింగ్లో ఉన్న పనులను పూర్తి చేయడానికి ఇది మంచి సమయం.ఈ పనులు ఖర్మాస్ ప్రతికూల ప్రభావాలను తగ్గిస్తాయి, సానుకూల శక్తిని కొనసాగించడంలో సహాయపడతాయి. ఈ కాలంలో ఓర్పు, భక్తి, సానుకూల కార్యాలపై దృష్టి పెట్టాలి. ఖర్మాస్ ముగిసిన తర్వాత కొత్త పనులు ప్రారంభించడం వల్ల శుభ ఫలితాలు లభిస్తాయి. ఖర్మాస్ అనేది ఆత్మపరిశీలన, సహనానికి సంబంధించిన సమయం. ఈ 30 రోజులు నియమాలను పాటిస్తే భవిష్యత్ కాలం మీకు చాలా శుభప్రదం అవుతుంది.
Click it and Unblock the Notifications
Sign in with Google