గాలి జనార్దన్ రెడ్డికి షాక్, పాత మైనింగ్ కేసు, క్రిమినల్ కేసు పెట్టండి, కోర్టు ఆర్డర్ !

బెంగళూరు/బళ్లారి: కర్ణాటక మాజీ మంత్రి, మైనింగ్ కింగ్, సొంత పార్టీ సింబల్ మీద అసెంబ్లీ ఎన్నికల్లో పోటీ చేస్తున్న గాలి జనార్దన్ రెడ్డికి కష్టాలు ఎదురైనాయి. చాలా సంవత్సరాల క్రితం నాటి ఓ కేసులో మాజీ మంత్రి గాలి జనార్దన్ రెడ్డితో సహ తదితరుల మీద క్రిమినల్ కేసు నమోదు చెయ్యాలని బెంగళూరులోని ప్రత్యేక కోర్టు ఆదేశాలు జారీ చేసింది.

మైనింగ్ కింగ్ అని పేరు తెచ్చుకున్న గాలి జనార్దన్ రెడ్డి, ఆయన సమీప బంధువు బీవీ. శ్రీనివాసరెడ్డి తదితరుల మీద అక్రమ మైనింగ్ కేసు నమోదు అయ్యింది. ఇదే కేసులో గాలి జనార్దన్ రెడ్డి, బీవీ. శ్రీనివాస్ రెడ్డి తదితరులను 2011లో అధికారులు అరెస్టు చేసి జైలుకు పంపించారు. తరువాత గాలి జనార్దన్ రెడ్డి సుప్రీం కోర్టులో బెయిల్ తీసుకున్నారు.

ఈ కేసు ప్రస్తుతం సీబీఐ దర్యాప్తు చేస్తోంది. ఇదే కేసుకు సంబంధించి బెంగళూరులోని ప్రత్యేక కోర్టు న్యాయమూర్తి గాలి జనార్దన్ రెడ్డి తదితరుల మీద క్రిమినల్ కేసు నమోదు చెయ్యాలని పోలీసు అధికారులకు ఆదేశాలు జారీ చేశారు. అయితే ఈసారి గాలి జనార్దన్ రెడ్డి మీద కర్ణాటక లోకాయుక్త అధికారులు ఫిర్యాదు చేశారు.

మాజీ సీఎం జనార్దన్ రెడ్డి తోపాటు ఆయన సమీప బంధువు శ్రీనివాస్ రెడ్డి, ఆలీ ఖాన్, కాంగ్రెస్ పార్టీ మాజీ ఎమ్మెల్యే బీ. నాగేంద్ర తదితరుల మీద కేసు నమోదు చెయ్యాలని కోర్టు ఆదేశాలు జారీ చేసింది. వీరితో పాటు మాజీ ఐఆర్ ఎస్ అధికారుల మీద కేసులు నమోదు చెయ్యాలని కర్ణాటక లోకాయుక్త అధికారులు ప్రత్యేక కోర్టుకు మనవి చేశారు. అసెంబ్లీ ఎన్నికలు పూర్తి అయ్యే లోపు గాలి జనార్దన్ రెడ్డి మీద ఎలాంటి కేసులు నమోదు కాకూడదు దేవుడా అంటూ ఆయన అభిమానులు అంటున్నారు.

English summary

Bengaluru special court orders to register a criminal case against Karnataka ex-minister Gali Janardhan Reddy.