ఇంజనీరింగ్ కాలేజ్ హాస్టల్ లో అమ్మాయి అనుమానాస్పద మృతి, మ్యాటర్ రివర్స్ !

Published: Wednesday, July 5, 2023, 15:19 [IST]

బెంగళూరు/చిక్కబళ్లాపురం: ఇంజనీరింగ్ కాలేజీ హాస్టల్‌లో విద్యార్థిని అనుమానాస్పదంగా మృతి చెందిన ఘటన కర్ణాటకలోని చిక్కబళ్లాపూర తాలూకా బిడగనహళ్లి సమీపంలోని నాగార్జున ఇంజినీరింగ్ కాలేజీలో చోటుచేసుకుంది. కర్ణాటకలోని కోలార్ జిల్లా శ్రీనివాసపూర తాలూకా (ఆంధ్రప్రదేశ్ సరిహద్దు)లోని యల్దూర్ గ్రామానికి చెందిన ప్రీతి(21) ఇంజినీరింగ్ కాలేజ్ లో ద్వితీయ సంవత్సరం చదువుతున్నది. ఇదే కాలేజ్ లోని హాస్టల్ లో ప్రీతి అనుమానాస్పదంగా మృతి చెందిందని ఆమె కుటుంబ సభ్యులు ఆరోపిస్తున్నారు.

మంగళవారం ఇంజనీరింగ్ కాలేజ్ లోని హాస్టల్ లో ఉంటున్న విద్యార్థులు అందరూ కాలేజ్ కు వెళ్లారు. అందరితో పాటు ప్రీతి కూడా కాలేజ్ కు వెళ్లిందని తెలిసింది. అయితే కాలేజ్ మధ్యలోనే ప్రీతి ఆమె ఉంటున్న కాలేజ్ హాస్టల్ లోకి వెళ్లింది. ప్రీతితో పాటు నివాసం ఉంటున్న సాటి అమ్మాయిలు ఆ సమయంలో కాలేజ్ లోనే ఉన్నారని తెలిసింది.

కాలేజ్ హాస్టల్ గదిలోకి వెళ్లిన ప్రీతి తరువాత ఫ్యాన్ కు ఉరివేసుకుని శవమై కనిపించిందని కాలేజ్ యాజమాన్యం అంటున్నది, వెంటనే కళాశాల యాజమాన్యం, హాస్టల్ సిబ్బంది ప్రీతిని స్థానిక ఆసుపత్రికి తరలించారు. అయితే అప్పటికే విద్యార్థిని ప్రీతి మృతి చెందినట్లు వైద్యులు తెలిపారు. ప్రీతి మృతదేహాన్ని చిక్కబళ్లాపూర జిల్లా ఆస్పత్రి మార్చురీకి తరలించారు.

ఇంజనీరింగ్ కాలేజ్ విద్యార్థిని ప్రీతి ఆత్మహత్యకు పాల్పడిందని, కారణం తెలియరాలేదని కళాశాల యాజమాన్యం తెలిపింది. మృతురాలి తల్లిదండ్రులు కూడా మా అమ్మాయి ప్రీతి చావుకు అసలు మ్యాటర్ తెలియదని, అసలు ఏం జరిగిందో తెలీయడం లేదని అంటున్నారు. మీ అమ్మాయి చాలా అనారోగ్యంతో ఉందని, వెంటనే మీరు రావాలని కాలేజ్ యాజమాన్యం ఫోన్ చేసి చెప్పిందని, మేము వచ్చేసరికి మా కుమార్తె ప్రీతి శవమై కనిపించిందని ఆమె కుటుంబ సభ్యులు విలపిస్తున్నారు.

తన కుమార్తె ప్రీతి మృతిపై అనుమానం వ్యక్తం చేస్తూ మృతురాలి తండ్రి బెంగళూరు రూరల్ జిల్లా దేవనహళ్లి తాలూకాలోని విజయపూర పోలీస్ స్టేషన్‌లో ఫిర్యాదు చేశారు. ప్రీతి ఆత్మహత్యకు కచ్చితమైన కారణాలు తెలియడం లేదని, పోస్టుమార్టం నివేదిక కోసం వేచి చూస్తున్నామని పోలీసు అధికారులు అంటున్నారు.

Published On July 5, 2023