అమీర్‌ఖాన్ 'పీకే' చూసిన సాధువులు, భగ్గుమన్న 'కంప్యూటర్ బాబా'

ఇండోర్: బాలీవుడ్ హీరో అమీర్ ఖాన్ నటించిన 'పీకే' చిత్రం పైన విమర్శలు ఆగడం లేదు. మధ్యప్రదేశ్‌లో కొందరు సాధువులు కలిసి ఈ సినిమాను చూశారు. అలా చూసిన వారిలో కంప్యూటర్ బాబా అనే సాధువు కూడా ఉన్నారు. ఈ చిత్రాన్ని చూసిన అనంతరం ఆ కంప్యూటర్ బాబా మండిపడ్డారు.

ఇండోర్‌లోని ట్రెజర్ ఐలాండ్ మాల్ మల్టీప్లెక్స్‌లో సినిమాను వారు చూశారు. మధ్యప్రదేశ్ సర్కారు, సెన్సార్ బోర్డు ఈ సినిమా నిలిపివేతకు చర్యలు తీసుకోకుంటే రాష్ట్రంలో తాము తీవ్ర ఆందోళనలు నిర్వహిస్తామని హెచ్చరించారు. హిందువులను అవమానించేందుకు ఈ సినిమాలో తీవ్రంగా ప్రయత్నించారని మండిపడ్డారు.

ఈ సినిమా ద్వారా హిందూమతాన్ని అపహాస్యం చేసే ప్రయత్నం చేశారన్నారు. రాష్ట్ర ముఖ్యమంత్రిని కలిసి సినిమా ప్రదర్శనను నిలిపివేయాలని కోరుతామని చెప్పారు. 35 మంది సాధువులు ఆదివారం నాడు ఈ సినిమాను వీక్షించారు.

కాగా, అమీర్ ఖాన్, అనుష్క శర్మ నటించిన పీకే చిత్రం పైన హిందుత్వ సంస్థలు ఆగ్రహం వ్యక్తం చేస్తున్న విషయం తెలిసిందే. ఈ సినిమాను నిషేధించాలని పెద్ద ఎత్తున డిమాండ్ చేస్తున్నారు. హిందుత్వ సంస్థలతో పాటు ముస్లీం మత పెద్దలు కూడా ఈ సినిమాలోని కొన్ని సన్నివేశాలను తొలగించాలని డిమాండ్ చేస్తున్నారు. దేశంలోని పలు నగరాల్లో ఈ సినిమాలు ప్రదర్శితమవుతున్న థియేటర్ల పైన దాడులు జరిగాయి.

English summary

A 'fact-finding team' of 35 sadhus watched the Aamir Khan-starrer 'PK' in Indore on Sunday and threatened to launch violent protests if the MP government and the censor board did not take steps to stop what they said was the ridiculing of Hindu deities in the movie.