11 పార్టీల భేటీ: మూడో కూటమి యత్నాలు

By Pratap

Published: Thursday, February 6, 2014, 11:22 [IST]

న్యూఢిల్లీ: లోక్‌సభ ఎన్నికల్లో 'ఫెడరల్ ఫ్రంట్' (సమాఖ్య కూటమి) ఏర్పాటుకు బిజెపి, కాంగ్రెసేతర పార్టీల నాయకులు సమాయత్తమయ్యారు. ఈ మేరకు బుధవారం ఢిల్లీలో 11 పార్టీల నాయకులు సమావేశమై ఉమ్మడి అంశాలపై ఒక అవగాహనకు వచ్చారు.

నాలుగు వామపక్షాలు, సమాజ్‌వాది, అన్నాడిఎంకే, అసోం గణపరిషత్ (ఎజిపి), జార్ఖండ్ వికాస్ మోర్చా, జెడిఎస్, బిజెడి, జెడియు పార్టీల నాయకులు ఈ భేటీలో పాల్గొన్నారు. అనంతరం వారు సంయుక్తంగా మీడియాతో మాట్లాడారు.

తమ కలయికను 'మూడో కూటమి'గా వ్యవహరించరాదని సిపిఎం అగ్రనేత సీతారాం ఏచూరి, జెడియు అధ్యక్షుడు శరద్‌యాదవ్ ఈ సందర్భంగా స్పష్టం చేశారు. ఈ నెల 9, 10 తేదీల్లో మరోసారి సమావేశమై కొత్త కూటమి అజెండాను ఖరారు చేస్తామని నితీశ్ చెప్పారు.

సిపిఎం ప్రధాన కార్యదర్శి ప్రకాష్ కారత్ ఇటీవల తమిళనాడు ముఖ్యమంత్రి జయలలితను కలవడం, ఆ పార్టీతో పొత్తు కుదుర్చుకోవడం కూడా సమాఖ్య ఏర్పాటును పటిష్టం చేయడానికేనని అంటున్నారు. తెలుగుదేశం పార్టీ అధ్యక్షుడు నారా చంద్రబాబు నాయుడు బిజెపి వైపు మొగ్గు చూపుతున్నారు. గతంలో ఆయన మూడో కూటమి ఏర్పాటు దిశగా కదిలారు.

Published On February 6, 2014