మిల్లెట్స్ పిండిపై జీఎస్టీ భారీగా తగ్గింపు, వీటిపైనా

న్యూఢిల్లీ: మిల్లెట్ల పిండిపై జీఎస్టీ(GST)ని తగ్గిస్తూ జీఎస్టీ కౌన్సిల్ నిర్ణయం తీసుకుంది. ప్రీ ప్యాకేజ్డ్ లేదా లేబుల్ వేసి విక్రయిస్తే ఇకపై 5 శాతం మాత్రమే జీఎస్టీ వర్తిస్తుందని కేంద్ర ఆర్థిక మంత్రి నిర్మలా సీతారామన్ తెలిపారు. ఇంతకుముందు దీనిపై జీఎస్టీ 18 శాతంగా ఉండేది. ఈ మేరకు శనివారం ఢిల్లీలో జరిగిన 52వ జీఎస్టీ కౌన్సిల్ సమావేశం అనంతరం నిర్మలా సీతారామన్ నిర్ణయాలను వెల్లడించారు.

కనీసం 70 శాతం మిల్లెట్లతో కూడిన పిండిని లూజుగా విక్రయిస్తే.. ఎలాంటి జీఎస్టీ వర్తించదని చెప్పారు. మిల్లెట్లను ప్రోత్సహించే ఉద్దేశంతో కౌన్సిల్ ఈ నిర్ణయం తీసుకుంది. ఇదే సమావేశంలో మొలాసిస్‌పై జీఎస్టీని తగ్గిస్తూ కౌన్సిల్ నిర్ణయం తీసుకుంది. ప్రస్తుతం మొలాసిస్‌పై 28 శాతంగా జీఎస్టీ ఉండగా.. దాన్ని 5 శాతానికి తగ్గించేందుకు నిర్ణయించింది కౌన్సిల్.

దీని వల్ల చెరకు రైతులకు మేలు జరుగుతుందని కేంద్రమంత్రి నిర్మలా సీతారామన్ తెలిపారు. మానవ అవసరాల కోసం వినియోగించే డిస్టిల్ ఆల్కహాల్ ను జీఎస్టీ నుంచి మినహాయిస్తున్నట్లు వెల్లడించారు. ఈ సందర్భంగా జీఎస్టీ అప్పీలేట్ ట్రైబ్యునల్ ప్రెసిడెంట్, సభ్యుల గరిష్ట్ వయసును నిర్ణయించారు. ఇకపై జీఎస్టీ అప్పీలేట్ ట్రైబ్యునల్ అధ్యక్షుడి గరిష్ట వయసు 70 ఏళ్లు, సభ్యుల వయస్సు 67 ఏళ్లుగా నిర్ణయించారు. ప్రస్తుతం ఈ వయో పరిమితి అధ్యక్షులకు 67, సభ్యులకు 65గా ఉంది.

కాగా, గతంలో జీఎస్టీ కౌన్సిల్ ఫిట్మెంట్ కమిటీ పొడి మిల్టెట్ ఉత్పత్తులపై పన్ను మినహాయింపును సిఫార్సు చేసింది. భారత్ 2023ని చిరుధాన్యాల సంవత్సరంగా ప్రకటించిన విషయం తెలిసిందే. అధిక పోషక విలువలున్న చిరు ధాన్యాల పొడి ఉత్పత్తులను ప్రోత్సహించడంలో భాగంగా జీఎస్టీ మినహాయింపు, తగ్గింపులను నిర్ణయించినట్లుగా తెలుస్తోంది.

English summary

GST Council Slashes Tax On Molasses To 5%, Exempts Alcohol For Consumption.