CSK vs RR : అరుదైన రికార్డు ముంగిట ధోనీ - సహచరుడు జడేజా కీలక వ్యాఖ్యలు...

ఇవాళ ఐపీఎల్ 2023లో భాగంగా రాజస్తాన్ రాయల్స్ తో చెన్నై సూపర్ కింగ్స్ కీలక మ్యాచ్ ఆడబోతోంది. ఇప్పటికే టోర్నీలో ఆడిన మూడు మ్యాచుల్లో రెండు విజయాలు, ఓ ఓటమితో పాయింట్ల పట్టికలో రెండో స్ధానంలో ఉన్న రాజస్తాన్ రాయల్స్ తో మ్యాచ్ ను ఆషామాషీగా తీసుకోరాదని చెన్నై భావిస్తోంది. టోర్నీని ఓటమితో ఆరంభించినా ఆ తర్వాత కోలుకున్న చెన్నై.. ఈ మ్యాచ్ లో విజయంతో టోర్నీలో కుదురుకునేందుకు ప్రయత్నిస్తోంది. ఈ నేపథ్యంలో ధోనీ ముంగిట ఓ రికార్డు ఊరిస్తోంది.

చెన్నైలోని ఎంఏ చిదంబరం స్టేడియంలో చెన్నై, రాజస్తాన్ జట్ల మధ్య జరిగే ఈ మ్యాచ్ ద్వారా కెప్టెన్ ధోని ఐపీఎల్ చరిత్ర పుస్తకాల్లో పదేళ్లపాటు తన పేరు నమోదు చేయనున్నాడు. భారత మాజీ కెప్టెన్ ధోనీ.. ఎల్లో బ్రిగేడ్ నాయకుడిగా తన 200వ మ్యాచ్ రికార్డ్ సాధించడానికి సిద్ధంగా ఉన్నాడు. ఐపీఎల్ చరిత్రలో అత్యధిక క్యాప్‌లు సాధించిన ఆటగాడిగా గుర్తింపు పొందిన ధోనీ, 200 మ్యాచ్‌ల్లో ఫ్రాంచైజీకి నాయకత్వం వహించిన తొలి ఆటగాడిగా కూడా రికార్డులకెక్కనున్నాడు.

ఐపీఎల్‌ చరిత్రలో కెప్టెన్‌గా ధోనీ 213 మ్యాచ్‌లు ఆడాడు. 41 ఏళ్ల ధోనీ.. ప్రపంచంలోనే అత్యంత ధనిక టీ20 టోర్నమెంట్‌లో చెన్నై సూపర్ కింగ్స్, రైజింగ్ పూణె సూపర్‌జెయింట్‌లకు కెప్టెన్ గా వ్యవహరించాడు. కెప్టెన్‌గా 213 మ్యాచ్‌ల్లో 58.96 విజయాల శాతం సాధించాడు. ఈ భారత మాజీ కెప్టెన్ ఐపీఎల్‌లో 125 మ్యాచ్‌లు గెలిచి 87 మ్యాచ్‌ల్లో ఓటములను చవిచూశాడు. ఐపీఎల్‌లో ధోనీ 236కు పైగా మ్యాచ్‌లు ఆడాడు. సీఎస్‌కే కెప్టెన్ ధోనీ 237 ఐపీఎల్ మ్యాచ్‌ల్లో 5,004కు పైగా పరుగులు చేశాడు.

ధోనీ ఐపీఎల్ లో అరుదైన రికార్డు సాధించబోతున్న వేళ.. అతని సహచరుడు, ఆల్ రౌండర్ రవీంద్ర జడేజా తన సారధిని ప్రశంసలతో ముంచెత్తాడు. నేనేం చెప్పను, ఆయన సీఎస్కేలోనే కాదు, భారత క్రికెట్‌కు కూడా లెజెండ్. ఆయనకు నా శుభాకాంక్షలు, ఈ గేమ్‌లో గెలిచి అతనికి బహుమతిగా ఇస్తామని ఆశిస్తున్నాను. కెప్టెన్‌గా ఇది ధోనీ 200వ మ్యాచ్. గత రెండు గేమ్‌లలో ఎలా ఆడామో అదే జోరును కొనసాగించాలని ఆశిస్తున్నానన్నాడు.

English summary

chennai superkings all rounder ravindra jadeja says captain ms dhoni to create ipl record in match against rajasthan royals today.