తమిళనాడులో 97.4 లక్షల ఓటర్లు తొలగింపు..?

తమిళనాడులో ప్రస్తుతం ప్రత్యేక సమగ్ర సవరణ (SIR) ప్రక్రియ కొనసాగుతున్న విషయం తెలిసిందే. అయితే శుక్రవారం విడుదల కానున్న ముసాయిదా ఓటరు జాబితాలో 5.44 కోట్ల మంది ఓటర్లు ఉంటారని అంచనా వేస్తున్నారు. SIR కు ప్రాథమికంగా తీసుకున్న 2025 ఓటర్ల జాబితాలోని 6.41 కోట్ల మందితో పోలిస్తే, ఇది 15.2 శాతం తగ్గుదల అని స్పష్టం అవుతోంది. అంటే తమిళనాడులో 15.2 శాతం ఓట్లను తొలగిస్తున్నట్లు అర్థం అవుతోంది. బిహార్ అసెంబ్లీ ఎన్నికల సమయంలో ఆ రాష్ట్రంలో 65 లక్షల ఓట్లను తొలగించిన విషయం తెలిసిందే. దాంతో SIR ప్రక్రియ బిహార్ లో వివాదాస్పదంగా మారింది.

ఈ తొలగింపులో భాగంగా చెన్నైలో 35.6 శాతం ఓటర్ల పేర్లు తొలగించే అవకాశం ఉన్నట్లు తెలుస్తోంది. TNIE పరిశీలించిన ఒక నివేదిక ప్రకారం, సోమవారం అధికారుల పర్యవేక్షణ కోసం రూపొందించిన సమాచారం మేరకు, వివిధ కారణాల వల్ల 97.4 లక్షల పేర్లను అన్ కలెక్టబుల్ గా గుర్తించారు.

తొలగించనున్న 97.4 లక్షల పేర్లలో, 52.6 లక్షల మంది (54.2శాతం) స్థానచలనం చెందినవారు.. అలాగే 26.9 లక్షల మంది (27.7శాతం) మరణించినవారు.. 13.6 లక్షల మంది (13.9శాతం) ఆచూకీ తెలియనివారు.. 3.98 లక్షల పేర్లు (4.1శాతం) నకిలీవి కాగా.. 16,400 మంది (0.2శాతం) ఇతర కారణాలతో అన్ కలెక్టబుల్ గా పేర్కొన్నారు.

ముసాయిదా విడుదలకు సంబంధించిన పనులు ఇంకా జరుగుతున్నందున, తుది సంఖ్యలలో స్వల్ప మార్పులు ఉండొచ్చని తెలుస్తోంది. చెన్నై ఓటర్ల సంఖ్య ప్రస్తుత 40.05 లక్షల నుండి 25.8 లక్షలకు (అంటే 35.6శాతం) తగ్గొచ్చని అంచనా ఏర్పడుతోంది. తొలగించిన 14.26 లక్షలమంది ఓటర్ల పేర్లలో, 12.23 లక్షల మంది (85.8శాతం) స్థాన చలనం అయినవారుగా గుర్తించారు.

ఇక తమిళనాడులోని పది జిల్లాల్లో ఓటర్ల సంఖ్య 15 శాతం కంటే ఎక్కువగా తగ్గే అవకాశం ఉంది. చెన్నైకు పొరుగున ఉన్న చెంగల్‌ పట్టులో 27.87 లక్షల మంది ఓటర్లకు గాను 7 లక్షల పేర్లు తొలగించడంతో.. 25.18 శాతం తగ్గింపుతో రెండో అతిపెద్ద తగ్గుదల నమోదయ్యే అవకాశం ఉంది. తిరుప్పూర్, కోయంబత్తూరులో వరుసగా 23.1శాతం, 20.2 శాతం తగ్గుదలను అంచనా వేశారు.

తిరుప్పూర్‌ లో 24.4 లక్షల మంది ఓటర్లలో 5.6 లక్షల మంది ఓటర్ల పేర్లు తొలగించగా, కోయంబత్తూరులోని 32.2 లక్షల మందిలో 6.5 లక్షల ఓటర్లను తొలగించొచ్చు. కాంచీపురం, తిరువళ్లూరు, దిండిగల్, వెల్లూర్, ఈరోడ్, తిరునల్వేలి.. తదితర మరో ఆరు జిల్లాల్లో కూడా SIR ముసాయిదా జాబితా 15 శాతం కంటే ఎక్కువ తగ్గొచ్చు. తమిళనాడులోని 38 జిల్లాల్లో కేవలం 10 జిల్లాల్లో మాత్రమే తొలగించే పేర్లు 10 శాతం కంటే తక్కువే. ముసాయిదా జాబితాలో ఉన్న 5.44 కోట్ల మంది ఓటర్లలో 2.02 కోట్ల మంది గత SIR జాబితాలో (2002 లేదా 2005) వారి సొంత పేర్లతో మ్యాప్ చేసినట్లు నివేదిక సూచిస్తోంది.

English summary

The Sir draft in Tamil Nadu projects 5.44 crore voters, about 15.2% fewer than the 2025 target. Data from district analyses show notable reductions in Chennai and other districts, with a verification process for those missing from the draft list. The final tally may adjust slightly as the process continues.