ప్రపంచానికి అద్భుతమైన రెండు రోజులు; యుద్దంపై ట్రంప్ సంచలన ప్రకటన!

ప్రపంచాన్ని గడగడలాడిస్తున్న అమెరికా-ఇరాన్ యుద్ధం క్లైమాక్స్‌కు చేరుకుందా? పశ్చిమాసియాలో ముంచుకొచ్చిన యుద్ధ మేఘాలు త్వరలోనే చెల్లాచెదురు కాబోతున్నాయా? అంటే అమెరికా అధ్యక్షుడు డొనాల్డ్ ట్రంప్ అవుననే సమాధానం ఇస్తున్నారు. "రాబోయే రెండు రోజుల్లో ప్రపంచం ఒక అద్భుతాన్ని చూడబోతోంది" అంటూ ఆయన చేసిన వ్యాఖ్యలు ఇప్పుడు అంతర్జాతీయ రాజకీయాల్లో తీవ్ర చర్చకు దారితీశాయి. ఇరాన్‌తో యుద్ధం త్వరలోనే ముగుస్తుందని, శాశ్వత శాంతి ఒప్పందం దిశగా అడుగులు పడుతున్నాయని ఆయన ఆశావాదాన్ని వ్యక్తం చేశారు.

ఒకవైపు చర్చల మాట వినిపిస్తున్నా, మరోవైపు అమెరికా సైన్యం ఇరాన్ గొంతు నులిమేలా సముద్ర మార్గాలను దిగ్బంధించింది. ఇరాన్ ఓడరేవుల నుంచి బయలుదేరే చమురు ట్యాంకర్లను అమెరికా యుద్ధ నౌకలు అడ్డుకుంటున్నాయి. వాల్ స్ట్రీట్ జర్నల్ నివేదిక ప్రకారం.. ఇప్పటికే ఎనిమిది ట్యాంకర్లను అమెరికా బలగాలు వెనక్కి పంపేశాయి. హార్ముజ్ జలసంధి గుండా చైనాకు వెళ్తున్న 'రిచ్ స్టార్రి' వంటి భారీ ట్యాంకర్లను సైతం అమెరికా వదలడం లేదు. దీనికి ప్రతిచర్యగా.. దిగ్బంధం కొనసాగితే పర్షియన్ గల్ఫ్, ఎర్ర సముద్రంలో అంతర్జాతీయ వాణిజ్యాన్ని స్తంభింపజేస్తామని ఇరాన్ సైన్యం హెచ్చరించడంతో ఉద్రిక్తత పరాకాష్టకు చేరింది.

మధ్యవర్తిగా పాకిస్థాన్.. ఇస్లామాబాద్‌లో కీలక భేటీ?

ఈ సంక్షోభాన్ని చల్లార్చేందుకు పాకిస్థాన్ తెరవెనుక వేగంగా పావులు కదుపుతోంది. పాక్ సైన్యాధిపతి ఫీల్డ్ మార్షల్ అసీం మునీర్ నేతృత్వంలోని బృందం బుధవారం టెహ్రాన్‌కు చేరుకుంది. అమెరికా పంపిన రాయబారాన్ని వారు ఇరాన్ పాలకులకు అందజేయనున్నారు. అమెరికా ఉపాధ్యక్షుడు జేడీ వాన్స్ ఈ చర్చలపై సానుకూలంగా ఉన్నారు. అణు ఆశయాల విషయంలో ఇరాన్ తన పట్టు వీడాలని వాషింగ్టన్ కోరుతుండగా, కనీసం 20 ఏళ్ల పాటు అణు కార్యక్రమాలను నిలిపివేయాలనే ప్రతిపాదనపై ఇరు దేశాల మధ్య సయోధ్య కుదిర్చేందుకు మధ్యవర్తులు శ్రమిస్తున్నారు.

మార్కెట్లపై 'ట్రంప్' ఎఫెక్ట్.. రికార్డు స్థాయిలో షేర్లు!

యుద్ధం ముగుస్తుందన్న ట్రంప్ ప్రకటన ప్రపంచ స్టాక్ మార్కెట్లకు బూస్ట్ ఇచ్చింది. స్టాక్ మార్కెట్లు రికార్డు స్థాయికి చేరుకోగా, చమురు ధరల్లో తీవ్ర ఒడిదుడుకులు కనిపిస్తున్నాయి. ఒక దశలో పడిపోయిన చమురు ధర, అమెరికా దిగ్బంధం ప్రకటనతో మళ్ళీ బ్యారెల్‌కు $96కి చేరింది. ఇరాన్‌కు ఆయుధాలు సరఫరా చేయవద్దని చైనా అధ్యక్షుడు జిన్‌పింగ్‌ను ట్రంప్ కోరగా, ఆయన సానుకూలంగా స్పందించడం గమనార్హం. వచ్చే నెలలో ట్రంప్ చైనా పర్యటనకు వెళ్లనున్న నేపథ్యంలో ఈ పరిణామాలు ప్రాధాన్యత సంతరించుకున్నాయి.

తీరని ప్రాణ నష్టం.. శాంతి కోసం వేచిచూపు!

ఈ భీకర పోరాటంలో ఇప్పటివరకు సుమారు 5,000 మంది ప్రాణాలు కోల్పోయినట్లు అంచనా. ఇందులో విద్యార్థులు, మహిళలు, ప్రొఫెసర్లు ఉండటం విషాదకరం. ఇజ్రాయెల్-హిజ్బుల్లా మధ్య లెబనాన్ వేదికగా జరుగుతున్న దాడులు కూడా ఈ ప్రాంతాన్ని వణికిస్తున్నాయి. ఈ నెల 22తో కాల్పుల విరమణ గడువు ముగియనుండటంతో, ఆలోపే ఒక శాశ్వత ఒప్పందాన్ని కుదుర్చుకోవాలని అమెరికా భావిస్తోంది. ట్రంప్ చెప్పిన ఆ 'అద్భుతమైన రెండు రోజులు' ప్రపంచానికి శాంతిని ఇస్తాయో లేదో వేచి చూడాలి.

English summary

President Donald Trump predicts an "amazing two days" ahead, signaling a potential end to the 2026 Iran war. Despite a failed round of talks in Islamabad led by VP JD Vance, diplomatic efforts continue as the US Navy enforces a strict naval blockade on Iranian ports. ఇరాన్‌తో యుద్ధం త్వరలోనే ముగుస్తుందని, శాశ్వత శాంతి ఒప్పందం దిశగా అడుగులు పడుతున్నాయని ట్రంప్ ఆశావాదాన్ని వ్యక్తం చేశారు.