కెనడాలో ఘనంగా టిడిఎఫ్ తెలంగాణ నైట్

టొరంటో: కెనడాలోని టొరంటో నగరంలో తెలంగాణ డెవలప్‌మెంట్‌ ఫోరమ్‌ (టి.డి.ఎఫ్‌.) ఆధ్వర్యంలో నిర్వహించిన 'తెలంగాణ నైట్‌' కార్యక్రమానికి స్థానిక ప్రవాస తెలంగాణ వాసుల నుంచి విశేష స్పందన లభించింది. మిస్సిసౌగలోని గ్లెన్‌ ఫారెస్ట్‌ సెకండరీ స్కూల్‌ ఆడిటోరియంలో నిర్వహించిన ఈ కార్యక్రమానికి, కెనడాలో నివసిస్తున్న 500 మందికి పైగా తెలంగాణ వాసులతో పాటు ఇతర ప్రాంతాల నుంచి కూడా ప్రత్యేక ఆహ్వానితులు, అతిథులు విచ్చేసారు.

కార్యక్రమంలో ముందుగా 1969 తెలంగాణ ఉద్యమంలో అమరులైన వీరులతో పాటు ఇటీవల అసువులుబాసిన 39 మంది 'తెలంగాణ' అమరులకు ఆహూతులు ఘనంగా నివాళులు అర్పించారు. అలాగే ఇటీవల మృతిచెందిన తెలంగాణ పోరాటయోధుడు, మాజీ ఎమ్మెల్యే పులివీరన్నకు కూడా సభికులు ఘనంగా నివాళులు అర్పించారు. ఈ సందర్భంగా ప్రత్యేక తెలంగాణ సాధన కోసం 1969 ఉద్యమం మొదలుకొని మొన్న మరణించేవరకూ పులివీరన్న పోరాట పటిమను సభికులు గుర్తుచేసుకున్నారు. ఈ కార్యక్రమం జరుగుతున్నంత సేపూ ఆహూతుల 'జై తెలంగాణ' నినాదాలతో సమావేశ ప్రాంగణం మారుమ్రోగింది.