న్యూజెర్సీలో కూచిపూడి నృత్య ప్రదర్శన

న్యూజెర్సీ: సంప్రదాయ ప్రాచీన నృత్యమైన కూచిపూడి నాట్యం ప్రపంచ వ్యాప్తంగా విస్తరించడం సంతోషించదగ్గ పరిణామమని న్యూజెర్సీ అసెంబ్లీ డిప్యూటీ స్పీకర్‌ చివుకుల ఉపేంద్ర అన్నారు. న్యూజెర్సీకి చెందిన నృత్యమాధవి నాట్య కళాశాల ఆధ్వర్యంలో స్థానిక నార్త్ ‌బ్రన్స్‌ విక్‌ పాఠశాలలో నిర్వహించిన నృత్య సుమ మాల కార్యక్రమానికి ఆయన ముఖ్యఅతిథిగా హాజరయ్యారు. ప్రవాసాంధ్రుల పిల్లలు కూచిపూడి నృత్యాన్ని అభ్యసించడానికి ఆసక్తి చూపడం సంతోషించదగ్గ పరిణామమని ఉపేంద్ర పేర్కొన్నారు.

ప్రముఖ సంగీత దర్శకుడు ఆర్పీ పట్నాయక్‌ మాట్లాడుతూ కూచిపూడి నృత్యానికి విశేష ప్రాముఖ్యత ఉందన్నారు. నృత్యమాధవి నాట్య కళాశాల వ్యవస్థాపకురాలు ఏలూరి దివ్య వద్ద శిక్షణ పొందిన 100 మంది బాలబాలికలు ప్రదర్శించిన కూచిపూడి నృత్యాలు ప్రేక్షకులను విశేషంగా అలరించాయి. నృత్యంలో విశేష ప్రతిభ చూపుతున్న మేడిచెర్ల శైలజ, రాహుల్‌ రెడ్డిలను కళాశాల డైరెక్టర్‌ ఏలూరి వేణు సత్కరించారు. కళా రంగాల్లోని వివిధ విభాగాల్లో ప్రతిభ కనబరిచిన వారికి అందజేసే అవార్డులను ఈ సారి 'వైవిద్య రత్న' పేరుతో ప్రకాశరావుకు, 'సంగీత సౌజన్య' పేరిట డాక్టర్‌ భవానీ ప్రకాశ్‌లకు అందజేశారు. కార్యక్రమంలో ఆనంద్‌ పాలూరి, తోట రవీందర్‌, గేదెల దాము, నేమన సత్య తదితరులు పాల్గొన్నారు.