వస్తాడు.. హిట్ కొడతాడు.. వెళ్తాడు.. మామూలు మాస్ కాదిది

ఈ రోజుల్లో స్టార్ హీరోల నుంచి చిన్న హీరోల వరకూ ఒక్క హిట్ కోసం నానా తంటాలు పడుతున్నారు. ప్రేక్షకుల్ని మెప్పించేందుకు అనేక సాహసాలు చేస్తున్నారు. కానీ కోలీవుడ్ స్టార్ హీరో సూర్య మాత్రం వరుసగా హిట్స్ తో దూసుకెళ్తున్నారు. ఒకదాన్ని మించి మరో సినిమాతో బాక్సాఫీస్ ను చెడుగుడు ఆడుకుంటున్నారు. ఈ ఏడాది ఏకంగా మూడు బ్లాక్ బస్టర్ హిట్స్ అందుకుని కుర్ర హీరోలకు కూడా సాధ్యం కాని రికార్డును తన ఖాతాలో వేసుకున్నారు సూర్య . గతంలో కంగువ, రెట్రో సినిమాలతో ప్రేక్షకుల్ని నిరాశ పరచిన సూర్య.. ఈ ఏడాది మాత్రం మూడు నెలలకో బ్లాక్ బస్టర్ హిట్స్ తో ప్రేక్షకులకు ఫుల్ మీల్స్ పెట్టారు. ఈ ఏడాది ఏప్రిల్ లో కరుప్పు సినిమాతో ప్రేక్షకుల ముందుకు వచ్చారు సూర్య. ఆర్జే బాలాజీ ఈ చిత్రానికి దర్శకత్వం వహించారు. ఈ మూవీలో సూర్యకు జోడీగా త్రిష నటించారు. ఈ మూవీ బ్లాక్ బస్టర్ హిట్ అయింది. దాదాపు రూ.350 కోట్లకు పైగా కలెక్షన్స్ ను సాధించింది.

తెలుగులో వీరభద్రుడు అనే టైటిల్ తో రిలీజ్ అయి ఇక్కడ కూడా సూపర్ హిట్ అయింది. ఆ తర్వాత ఆగస్టులో విశ్వనాథ్ అండ్ సన్స్ అనే సినిమాతో వచ్చారు సూర్య. ఈ మూవీని టాలీవుడ్ టాలెంటెడ్ దర్శకుడు వెంకీ అట్లూరి తెరకెక్కించారు. ఈ మూవీలో సూర్య సరసన మలయాళం యంగ్ బ్యూటీ మమితా బైజు హీరోయిన్ గా నటించింది. ఈ మూవీ కూడా సూపర్ హిట్ అయింది. బాక్సాఫీస్ వద్ద రూ. 250 కోట్లకు పైగా వసూళ్లు రాబట్టింది. ఇలా వరుసగా రెండు భారీ విజయాలను అందుకున్న సూర్య.. ఇప్పుడు దీపావళి కానుకగా నవంబర్ 6 న సీన్ అనే మూవీతో వచ్చారు. విశేషం ఏంటంటే ఈ మూవీ కూడా బ్లాక్ బస్టర్ టాక్ తో నడుస్తోంది. ఆయన గత రెండు సినిమాల కంటే సీన్ మూవీ భారీ స్థాయిలో ప్రజాదరణ రావడం గమనార్హం.

సీన్ మూవీకి జితూ మాధవన్ దర్శకత్వం వహించారు. ఈ మూవీలో సూర్య సరసన నజ్రియా హీరోయిన్ గా నటించారు. అలాగే ప్రేమలు, లోకా చిత్రాలతో మంచి గుర్తింపు తెచ్చుకున్న మలయాళం యంగ్ హీరో నస్లేన్ ఈ మూవీలో ఓ వైవిధ్యమైన విలన్ గా మెప్పించారు. ఇక సీన్ మూవీ విడుదలైన తొలి మూడు రోజుల్లోనే ప్రపంచవ్యాప్తంగా రూ. 100 కోట్లకు పైగా వసూళ్లు సాధించి బాక్సాఫీస్ వద్ద జోరు చూపించింది. ప్రస్తుతం రూ. 150 కోట్లకు చేరువలో ఉంది. ఈ చిత్రాన్ని 2డీ ఎంటర్​టైన్​మెంట్స్ బ్యానర్ ​పై సూర్య సతీమణి జ్యోతిక ప్రతిష్ఠాత్మకంగా నిర్మించారు. ఇక స్టార్ హీరోలు ఏడాదికి ఒక సినిమా తీయడమే గగనం అయిపోతున్న ఈ రోజుల్లో ఒకే ఏడాదిలో ఇలా వరుసగా మూడు హిట్స్ అందుకోవడం నిజంగా ప్రశంసించదగ్గ విషయమనే చెప్పాలి.