ఎవరు 'పెద్దో' ఎలాతెలిసేది?

నిన్న వైఎస్ రాజశేఖరరెడ్డి, చంద్రబాబు నాయుడు అసెంబ్లీలో పరస్పరం చేసుకున్న ఆరోపణలు, దూషణలు ప్రజలకు ఏవగింపు కలిగించాయి. "నువ్వు దొంగ అంటే నువ్వు దొంగ" అన్న రీతిలో వారి విమర్శలు సాగాయి. రామలింగరాజు వద్ద ఎవరు ఎక్కువ తీసుకున్నారో అన్నది స్పష్టం కాలేదు కానీ కుంభకోణాల్లో ఇద్దరి పాత్ర ఉందేమోనన్న అభిప్రాయం సామాన్యులకు కలుగకమానదు. వైఎస్ కుమారుడు జగన్ అల్లరి చిల్లరి వాడన్నట్టు చంద్రబాబు మాట్లాడారు. బాబు కుమారుడు లోకేష్ భాగోతమంతా తెలుసన్నట్టు వైఎస్ మాట్లాడారు. లోకేష్ రామలింగరాజు కుమారుడు తేజా రాజుకు అమెరికాలో క్లాస్ మేట్ అన్న విషయాన్ని వైఎస్ బయట పెట్టారు. స్పీకరు గనుక ఈరోజు కూడా ఆ అంశం మీద చర్చకు అనుమతిస్తే ఇంకా ఎన్నో విషయాలు బయటికి వచ్చి జనాన్ని పరమానంద భరితులను చేసి ఉండేవి.

నేడు అసెంబ్లీలో ప్రజాప్రతినిధుల ప్రవర్తన, మార్షల్స్ దురుసుతనం కూడా జనానికి ఏవగింపు కలిగించి ఉంటాయి. ఇవన్నీ కాంగ్రెస్, టీడీపీల మీద జనానికి వ్యతిరేకత పెంచే అంశాలు. అసెంభ్లీని మరో వారం రోజుల పాటు పొడిగిస్తే చిరంజీవి వంటి కొత్త రాజకీయ నాయకులే నయమనుకుని జనం మారిపోయే అవకాశం వచ్చి ఉండేది.