సరిహద్దుల్లో యుద్ధ వాతావరణం

న్యూఢిల్లీః భారత పాకిస్తాన్‌ సరిహద్దుల్లో యుద్ధ వాతావరణం కనిపిస్తున్నది. ఇరు దేశాల సైనిక బలగాల మధ్య కాల్పుల హోరు కొనసాగుతున్నది. పూర్తి స్థాయి యుద్ధం ఏ క్షణంలోనైనా బద్దలయ్యే అవకాశం వున్నదన్న వార్తలు వెలువడుతున్నాయి. ఇరు దేశాల సరిహద్దుల్లో నెలకొని వున్న పరిస్థితి పై అమెరికా కూడా ఆందోళన చెందుతున్నది. ఉభయదేశాల మధ్య పూర్తి స్థాయి యుద్ధ వాతావరణం నెలకొని వున్నదని రెండు దేశాలు పోటీపడి అణ్వాస్త్రాలను కూడా మొహరిస్తున్నాయని ఇంటలిజెన్స్‌ వర్గాలనుంచి నివేదికలు అందడంతో ఈ రెండు దేశాల సరిహద్దులపై గట్టి నిఘాకు అమెరికా ఆదేశించింది.

సిఐఎ, ఇతర సైనికి ఇంటలిజెన్స్‌ వర్గాలు డేగ కళ్లతో పరిస్థితిని గమనిస్తున్నాయని అమెరికన్‌ పత్రికలు వెల్లడించాయి. ఉపఖండంలోని ఉద్రిక్తతల పట్ల అమెరికా ఆందోళనతో వున్నదని అమెరికా ప్రతినిధులు అంటున్నారు. ఇదిలా వుండగా జమ్మూకాశ్మీర్‌లో పాకిస్తాన్‌ సైనికులు ఎలాంటి కవ్వింపు లేకుండ మోర్టార్లు, రాకెట్‌ లాంచర్లతో దాడులు కొనసాగిస్తున్నారు. ప్రతిగా భారత సైన్యం కూడా ఎదురు కాల్పులు జరుపుతున్నది. సరిహద్దుల్లో సైన్యం మొహరింపు పూర్తయినట్టుగా భారత సైనిక వర్గాలు ప్రకటించాయి. అణ్వాస్త్రాల ప్రయోగానికి పాకిస్తాన్‌ సాహసిస్తే ఆ దేశం నామరూపాలు లేకుండా పోతుందని భారత సైనికదళాల ప్రధానాధికారి పద్మనాభన్‌ హెచ్చరించిన నేపథ్యంలో యుద్ధ భయాలు మరింత ముమ్మరమయ్యాయి. శనివారం నాడు పాక్‌ అధినేత ముషారఫ్‌ తమ దేశ ప్రజలను ఉద్దేశించి ప్రసంగించనున్నారు. ఈ ప్రసంగంలో పాక్‌ ఉద్దేశ్యాలు పూర్తిగా బట్టబయలు అయ్యే అవకాశం వుంది. హిమాచలప్రదేశ్‌ తదితర 11 రాష్ట్రాలను ప్రధాని అభినందించారు.