చదువుల పండగ ప్రారంభం

హైదరాబాద్‌ః సంపూర్ణ అక్షరాస్యత సాధనను దృష్టిలో వుంచుకుని రాష్ట్ర ప్రభుత్వం అట్టహాసంగా చేపట్టన చదువుల పండుగ కార్యక్రమాన్ని ముఖ్యమంత్రి చంద్రబాబు సరస్వతీ క్షేత్రం బాసరలో ప్రారంభించారు. చట్టుపక్కల ప్రాంతాల నుంచి పెద్ద సంఖ్యలో బాలలను రప్పించి మళ్లీ బడిలో చేర్పించేందుకు ఏర్పాట్లు చేశారు. పిల్లలతో ముఖ్యమంత్రి చదువుకుంటామనే శపథం చేయించారు.

ముఖ్యమంత్రి రాక సందర్భంగా బాసరలో భారీ ఎత్తున బందోబస్తు ఏర్పాట్లు చేశారు. చదువుల తల్లికి నిలయమైన బాసరలో ప్రభుత్వం భారీ ఎత్తున అభివృద్ధి పనులను చేపట్టింది. వివిధ ప్రాంతాల వ్యాపారుల దృష్టి కూడా ఈ ప్రాంతంపై పడటంతో ఇక్కడ భూముల ధరలు కూడా హఠాత్తుగా భగ్గుమనే స్థాయికి చేరాయి. ఇదిలా వుండగా రాష్ట్ర గవర్నర్‌ రంగరాజన్‌ కృష్ణాజిల్లా గన్నవరంలో చదువుల పండగను ప్రారంభించారు. మండలంలోని వివిధ ప్రాంతాలనుంచి సుమారు నాలుగువందల మంది పిల్లలను రప్పించి వారిని మెయిన్‌ స్కూల్స్‌లో బ్రిడ్జి స్కూళ్లలో చేర్పించే ఏర్పాటు చేశారు. హైదరాబాద్‌లో సిటీ మంత్రులువిజయరామారావు, తలసాని శ్రీనివాసయాదవ్‌ జంటగా చదువుల పండగ వేడుకలను ఆరంభించారు.