బోగస్‌ సర్టిఫికెట్లతో నియామకాలు రద్దు

హైదరాబాద్‌: బోగస్‌ సర్టిఫికెట్ల వెల్లువ బయట పడడంతో మల్టీపర్పస్‌ హెల్త్‌అసిస్టెంట్‌ పోస్టుల నియామకాన్ని రాష్ట్ర ప్రభుత్వం రద్దు చేసింది. ఈ నియామకాలను వారం రోజుల తర్వాత జిల్లాసెలెక్షన్‌ కమిటీలు చేపట్టనున్నట్లు వైద్య ఆరోగ్య శాఖ మంత్రి డాక్టర్‌ కోడెల శివప్రసాద రావు గురువారంవిలేకరుల సమావేశంలో చెప్పారు.

మొత్తం 2,300 పురుషుల మల్టీ పర్పస్‌ హెల్త్‌ అసిస్టెంట్‌ పోస్టుల నియామకానికి ఇటీవల రాత పరీక్షలు జరిగాయి. ఈ పోస్టులకు దరఖాస్తు చేసిన వారిలో 80 శాతం మంది బోగస్‌ సర్టిఫికెట్లతోనే వచ్చారని విచారణలో తేలింది. దీంతో నియామకాలను రద్దు చేశారు. బోగస్‌ సర్టిఫికెట్లను జారీ చేసిన నాలుగు పారా మెడికల్‌ వైద్య విద్యాసంస్థల గుర్తింపును రద్దు చేస్తున్నట్లు ఆయన చెప్పారు. ఇందులో ముంబాయి, ఢిల్లీ, ఒంగోలు, విశాపట్నంలో ఉన్న సంస్థలున్నాయి.