వైయస్ కు వీరప్పమొయిలీ బాసట

న్యూఢిల్లీ: ముఖ్యమంత్రి డాక్టర్ వైయస్ రాజశేఖర రెడ్డికి కాంగ్రెస్ ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ బాసటగా నిలిచారు. తెలంగాణపై ముఖ్యమంత్రి డాక్టర్ వైయస్ రాజశేఖర రెడ్డి మాటలను మీడియా వక్రీకరించిందని, దానివల్లనే అపోహలు ఏర్పడ్డాయని ఆయన మంగళవారం మీడియా ప్రతినిధులతో అన్నారు. తాను ముఖ్యమంత్రితో మాట్లాడానని, ముఖ్యమంత్రి ఎలాంటి వారో తనకు తెలుసునని ఆయన చెప్పారు.

కాంగ్రెస్ ఎజెండాలో తెలంగాణ ఉందని, దానికి పార్టీ ప్రాధాన్యం ఇస్తోందని ఆయన అన్నారు. తెలంగాణపై రెండో ఎస్సార్సీ ప్రసక్తి లేదని, ఉమ్మడి కార్యాచరణ ప్రణాళికలో చెప్పిన మాటకు కట్టుబడి ఉన్నామని తాను ఇదివరకే చెప్పినట్లు ఆయన గుర్తు చేశారు. తెలంగాణపై ఏకాభిప్రాయ సాధనకోసం ప్రణబ్ ముఖర్జీ సీరియస్ గా ప్రయత్నిస్తున్నారని ఆయన చెప్పారు.