పవన్ కేసు: ప్రొటెస్టు పిటిషన్ దాఖలు

విశాఖపట్నం: ప్రముఖ నటుడు పవన్ కళ్యాణ్ బహుభార్యాత్వం కేసులో ఆయన భార్య నందిని శుక్రవారంనాడు అదనపు మెట్రోపాలిటన్ మెజిస్ట్రేట్ కోర్టు ముందు ప్రొటెస్ట్ పిటిషన్ దాఖలు చేశారు. పవన్ కళ్యాణ్ రెండో పెళ్లి చేసుకున్నట్లు ఆధారాలు లేవని నమ్ముతున్నట్లు కోర్టు తన నిర్ణయాన్ని వెల్లడిస్తూ దీనిపై అభ్యంతరాలుంటే ప్రొటెస్టు పిటిషన్ దాఖలు చేసుకోవచ్చునని నందినికి అవకాశం ఇచ్చింది. దీంతో నందిని శుక్రవారం ప్రొటెస్టు పిటిషన్ దాఖలు చేశారు.

ఈ కేసు విచారణ శుక్రవారం మధ్యాహ్నానికి వాయిదా పడింది. మధ్యాహ్నం విచారణకు పవన్ కళ్యాణ్ తో పాటు నందిని కూడా హాజరు కావచ్చు. రేణూదేశాయ్ ని తాను పెళ్లి చేసుకోలేదని, ఆమెతో సహజీవనం మాత్రమే చేస్తున్నానని, తమకు పిల్లవాడు కూడా ఉన్నాడని పవన్ కళ్యాణ్ వాదిస్తున్నారు. పాస్ పోర్టు అఫిడవిట్ లోనూ ఇదే విషయాన్ని తెలియజేశారు. దీంతో వారిద్దరి మధ్య వివాహం జరిగినట్లు ఆధారాలు లేవని కోర్టుకు పోలీసులు తమ నివేదికలో తెలియజేశారు. పోలీసు నివేదికను విశ్వసిస్తున్నామని కోర్టు తెలియజేసింది. విడాకుల కేసులో ఇరువురికి కోర్టు కౌన్సెలింగ్ నిర్వహించవచ్చు.