తెలంగాణపై కాంగ్రెస్ దాటవేత: ఏచూరి

హైదరాబాద్: అంతర్గత సమస్యల వల్లనే తెలంగాణపై కాంగ్రెస్ దాటవేత వైఖరి అవలంబిస్తోందని సిపియం పోలిట్ బ్యూరో సభ్యుడు సీతారాం ఏచూరి అన్నారు. తెలంగాణ బంతి ప్రస్తుతం కాంగ్రెస్ కోర్టులోనే ఉందని ఆయన అన్నారు. సిపియం రాష్ట్ర మహాసభల్లో పాల్గొనడానికి హైదరాబాద్ వచ్చిన ఆయన శుక్రవారం మీడియా ప్రతినిధులతో మాట్లాడారు. తెలంగాణకు సిపియం అడ్డుపడుతోందనే ప్రచారాన్ని కాంగ్రెస్ మానుకోవాలని ఆయన సలహా ఇచ్చారు. తెలంగాణపై కాంగ్రెస్ వైఖరేమిటో ముందు వెల్లడించాలని ఆయన డిమాండ్ చేశారు.

ఐక్యప్రగతిశీల కూటమి (యుపిఎ) ఉమ్మడి కార్యాచరణ ప్రణాళిక (సిఎంపి)ని అమలు చేయడానికి ఇవే చివరి పార్లమెంటు బడ్జెట్ సమావేశాలని ఆయన అన్నారు. తెలంగాణపై ఏర్పడిన ప్రణబ్ ముఖర్జీ కమిటీకి అన్ని పార్టీలు ఇప్పటికే తమ అభిప్రాయాలను తెలియజేశాయని ఆయన చెప్పారు.