సోనియా, వైయస్ అడ్డు: దత్తాత్రేయ

హైదరాబాద్: తెలంగాణ రాష్ట్రం ఏర్పాటుకు కాంగ్రెస్ అధ్యక్షురాలు సోనియా గాంధీ, ముఖ్యమంత్రి డాక్టర్ వైయస్ రాజశేఖర రెడ్డి అడ్డుగా ఉన్నారని భారతీయ జనతా పార్టీ (బిజెపి) రాష్ట్రాధ్యక్షుడు బండారు దత్తాత్రేయ విమర్శించారు. బిజెపిపై విమర్శలు మాని పార్లమెంటులో బిల్లు ప్రతిపాదించాలని, బిల్లుకు తాము మద్దతు ఇస్తామని ఆయన బుధవారం మీడియా ప్రతినిధుల సమావేశంలో అన్నారు. ఫిబ్రవరి నుంచి తమ తెలంగాణ ఉద్యమాన్ని ఉధృతం చేస్తామని ఆయన చెప్పారు.

తెలంగాణపై వినిపించడానికి తెలంగాణ కాంగ్రెస్ నాయకులకు ఆంధ్రప్రదేశ్ కాంగ్రెస్ వ్యవహారాల ఇంచార్జీ వీరప్ప మొయిలీ సోనియా అపాయింట్ మెంటు ఇప్పించకపోవడాన్ని ఆయన తప్పు పట్టారు. అపాయింట్ మెంటు తన పని కాదని వీరప్ప మొయిలీ అనడం బాధ్యతారాహిత్యమని ఆయన అన్నారు. వీరప్ప మొయిలీ వ్యవహారం తెలంగాణపై చిత్తశుద్ధి లేకపోవడాన్ని తెలియజేస్తోందని ఆయన వ్యాఖ్యానించారు.