రాజశేఖర్ ఇంటి వద్ద పికెట్

హైదరాబాద్: సినీ నటుడు రాజశేఖర్ ఇంటి వద్ద పోలీసు పికెట్ ఏర్పాటు చేసినట్లు, రక్షణకు రాజశేఖర్ కు ఒక గన్ మన్ ను కూడా ఇచ్చినట్లు హైదరాబాద్ పోలీసు కమీషనర్ ప్రసాదరావు చెప్పారు. రాజశేఖర్ పై దాడి చేసినవారు ఇనుపరాడ్లతో వచ్చారని, కేసుతో సంబంధం లేనివారు లొంగిపోయినట్లు సమాచారం ఉందని ఆయన బుధవారం మీడియా ప్రతినిధులతో అన్నారు. రాజశేఖర్ కుటుంబ సభ్యులపై దాడి కేసులో పంజగుట్ట పోలీసులు మరో ఇద్దర్ని అరెస్టు చేశారు.

ఇదిలా ఉంటే, రాజకీయాల్లోకి వచ్చే ఆలోచన ఉందని చెప్పిన రాజశేఖర్ తాజాగా తెలంగాణకు తన మద్దతు ప్రకటించారు. ఎవరు అడ్డుకున్నా తెలంగాణ వచ్చి తీరుతుందని, వచ్చే ఎన్నికల్లో తెలంగాణ సెంటిమెంటే గెలుస్తుందని ఆయన అన్నారు. ఒక టీవీ చానెల్ నిర్వహించిన ప్రజలతో ముఖాముఖి కార్యక్రమంలో ఆయన మాట్లాడారు. ప్రజలు కోరుతున్నందున తెలంగాణ ఇవ్వాల్సిందేనని ఆయన అన్నారు. తాను ఏ పార్టీలో చేరినా తెలంగాణకు మద్దతు ఇవ్వాలని కోరుతానని ఆయన అన్నారు.