తెరాస సభ్యులపై రోశయ్య మండిపాటు

హైదరాబాద్: రాష్ట్ర శాసనసభలో గవర్నర్ ఎన్.డి. తివారీ ప్రసంగం సందర్బంగా తెలంగాణ రాష్ట్ర సమితి (తెరాస) సభ్యులు వ్యవహరించిన తీరును శాసనసభా వ్యవహారాల మంత్రి కె. రోశయ్య తప్పు పట్టారు. ప్రత్యేక రాష్ట్రం కావాలనుకునే తెరాస సభ్యులకు సభా సమావేశాలను ఉపయోగించుకునే ఉద్దేశం లేదని ఆయన మీడియా ప్రతినిధుల సమావేశంలో అన్నారు. గవర్నర్ ప్రసంగం ప్రతులు చించి విసిరేయడం సరైన చర్య కాదని ఆయన అన్నారు. తెలుగుదేశం సభ్యుల వ్యవహార శైలి కూడా బాగా లేదని ఆయన అన్నారు. గవర్నర్ ప్రసంగం సమయంలో తెలుగుదేశం సభ్యులు రన్నింగ్ కామెంట్రీ వినిపించారని, దీనివల్ల ప్రసంగం వినాలనుకున్న మిగతా సభ్యులందరికీ నష్టం కలుగజేశారని ఆయన విమర్శించారు.

శాసనసభా సమావేశాల మొదటి రోజే ఇలా అయితే ఎలా అని ఆయన ప్రశ్నించారు. సభా సమావేశాలను సక్రమంగా నడుపుకుందామని ఆయన ప్రతిపక్షాలకు సూచించారు. ప్రజా సమస్యలపై చర్చకు ప్రభుత్వం సమ్మతిస్తుందని ఆయన చెప్పారు. ప్రతిపక్షాల సభ్యులు గొడవ చేస్తుంటే తాము ఎంత సేపని మౌనంగా ఉంటామని, తమ ఓపికకు హద్దులుండవా అని ఆయన అడిగారు. సందర్భానికి విరుద్ధంగా మాట్లాడితే ఎలా అని ఆయన ప్రశ్నించారు. సభా గౌరవాన్ని కాపాడుకునేందుకు కృషి చేద్దామని ఆయన ప్రతిపక్షాలను కోరారు.