తెరాసకు ఓపిక లేదు: మొయిలీ

న్యూఢిల్లీ: తెలంగాణ రాష్ట్ర సమితి (తెరాస) నాయకులకు ఓపిక లేదని కాంగ్రెస్ ఆంధ్రప్రదేశ్ వ్యవహారాల ఇంచార్జీ వీరప్పమ మొయిలీ వ్యాఖ్యానించారు. తెరాస సామూహిక రాజీనామాల వ్యవహారం రాజకీయ నాటకమని ఆయన సోమవారం మీడియా ప్రతినిధులతో అన్నారు. తెరాస కాంగ్రెస్ పాలనను సహించలేకపోతోందని ఆయన అన్నారు. తమ పార్టీ అధ్యక్షురాలు సోనియా గాంధీ తెలంగాణ పార్టీ నాయకులకు అపాయింట్ మెంట్ ఇవ్వకపోవడం తెలుగు ప్రజల ఆత్మగౌరవాన్ని కించపరచడమేనని తెలుగుదేశం పార్టీ అధ్యక్షుడు నారా చంద్రబాబు నాయుడు అనడాన్ని ఆయన ఖండించారు. తమ పార్టీ గురించి చంద్రబాబుకు ఏం పని ఆయన అడిగారు.

సోనియా గాంధీ గతంలోనే సీనియర్ నాయకులను కలిశారని, ముఖ్యంగా తెలంగాణ పార్టీ నాయకులను కలిశారని, తెలంగాణ సీనియర్ నాయకులకు సోనియా అపాయింట్ మెంట్ ఇవ్వకపోవడం ద్వారా అవమానించారనే మాటలో నిజం లేదని ఆయన అన్నారు. అది తమ పార్టీ అంతర్గత వ్యవహారమని, దీంతో చంద్రబాబుకు పని లేదని, తాము ఆ సమస్యను పరిష్కరించుకుంటామని ఆయన చెప్పారు.