గవర్నర్ ప్రసంగం అభివృద్ధికి అద్దం: వైయస్

హైదరాబాద్: శాసనసభలో గవర్నర్ ఎన్.డి. తివారీ ప్రసంగం రాష్ట్ర అభివృద్దికి అద్దం పట్టిందని ముఖ్యమంత్రి డాక్టర్ వైయస్ రాజశేఖర రెడ్డి చెప్పారు. ప్రాంతీయ అసమానతల తొలగింపునకు గట్టి కృషి చేస్తామని గవర్నర్ చెప్పినట్లు ఆయన సోమవారం మీడియా ప్రతినిధుల సమావేశంలో గుర్తు చేశారు. గవర్నర్ ప్రసంగంలోని ముఖ్యాంశాలను ఆయన వివరించారు. రాష్ట్ర స్థూల జాతీయోత్పత్తి తెలుగుదేశం ప్రభుత్వ హయాంలో కన్నా 3 శాతం అధికంగా పెరిగిందని ఆయన చెప్పారు. జలయజ్ఞం ద్వారా రాష్ట్ర ఆర్థిక వ్యవస్థను మార్చేస్తామని ఆయన చెప్పారు. అన్ని ప్రాంతాల సమతుల అభివృద్దికి ప్రతి జిల్లాలోని ముఖ్య పట్టణాలకు నాలుగు లైన్ల రోడ్ల నిర్మాణం పనికి వస్తుందని ఆయన చెప్పారు.

వ్యవసాయానికి, వ్యవసాయ అనుబంధ కార్యకలాపాలకు ప్రాధాన్యం ఇస్తామని ఆయన చెప్పారు. ఏప్రిల్ 1వ తేదీ నుంచి రెండు రూపాయలకు కిలో బియ్యం పథకాన్ని అమలు చేస్తామని ఆయన చెప్పారు. గృహ నిర్మాణానికి నిధులు పెంచినట్లు ఆయన తెలిపారు. తాము అధికారంలోకి వచ్చిన తర్వాత ప్రణాళిక వ్యయం మూడింతలు పెంచినట్లు ఆయన తెలిపారు. దేశంలో కన్నా రాష్ట్రంలో సంపద వేగంగా పెరుగుతోందని ఆయన చెప్పారు. వెనకబడిన ప్రాంతాల అభివృద్ధి గురించి కూడా శాసనసభలో చర్చ జరుగుతుందని ఆయన చెప్పారు. ప్రభుత్వం తప్పు చేస్తే విమర్శించాలని, తప్పులు చేస్తే సరిదిద్దుకుంటామని, చర్చ జరగకుండా చేయడం వల్ల ప్రజలకు ప్రయోజనం చేకూరదని ఆయన అన్నారు. కొత్త పన్నులు వేయకుండా పన్నుల వసూళ్లను సమర్థంగా చేయడం వల్ల ఆర్థికాభివృద్ధి జరిగిందని ఆయన చెప్పారు.