ఎన్టీఆర్ పేరు కోసం టిడిపి పట్టు

హైదరాబాద్: శంషాబాద్ అంతర్జాతీయ విమానాశ్రయం డొమెస్టిక్ టెర్మినల్ కు మాజీ ముఖ్యమంత్రి ఎన్టీ రామారావు పేరు పెట్టాలని డిమాండ్ చేస్తూ తెలుగుదేశం సభ్యులు బుధవారం శాసనసభా కార్యక్రమాలను అడ్డుకున్నారు. దీంతో స్పీకర్ కె.ఆర్. సురేష్ రెడ్డి సభను 15 నిమిషాల పాటు వాయిదా వేశారు. బుధవారం సభ సమావేశం కాగానే ప్రతిపక్షాలు వివిధ అంశాలపై వాయిదా తీర్మానాలు ప్రతిపాదించాయి.

శంషాబాద్ అంతర్జాతీయ విమానాశ్రయం డొమెస్టిక్ టెర్మినల్ కు ఎన్టీ రామారావు పేరు పెట్టాలని, వికలాంగుల సమస్యలపై వామపక్షాలు, విమానాశ్రయాల్లో సిబ్బంది సమ్మెపై బిజెపి వాయిదా తీర్మానాలు ప్రతిపాదించాయి. వాటిని స్పీకర్ తిరస్కరించారు. తెలుగువారిని ఉనికి ఢిల్లీకి చాటిన ఎన్టీ రామారావు పేరును ఒక టెర్మినల్ కు కూడా పెట్టకపోవడంపై తెలుగుదేశం నిరసన వ్యక్తం చేసింది. ఈ అంశంపై చర్చకు అనుమతించాలని పట్టు పట్టింది. నోటీసు ఇస్తే చర్చకు అవకాశం ఇస్తానని స్పీకర్ చెప్పారు. అయినా వినకుండా తెలుగుదేశం సభ్యులు ఆందోళనకు దిగడంతో సభను స్పీకర్ 15 నిమిషాల పాటు వాయిదా వేశారు.