అదే చివరి మాట: వీరప్ప మొయిలీ

న్యూఢిల్లీ: భువనగిరి సభ జరపవద్దని చివరి మాటగా తమ పార్టీ తెలంగాణ సీనియర్లకు చెప్పానని, ఇక వారిష్టమని కాంగ్రెస్ ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ అన్నారు. తాను హైదరాబాద్ వెళ్లేది లేదు, వారిని ఢిల్లీకి పిలిచేది లేదు అని ఆయన బుధవారం మీడియా ప్రతినిధులతో అన్నారు. సీనియర్లకు ఢిల్లీ నుంచి పిలుపు వచ్చిందని సీనియర్ కాంగ్రెస్ శాసనసభ్యుడు ఎం. సత్యనారాయణ రావు హైదరాబాదులో చెప్పారు. కాగా, సీనియర్లను బుజ్జగించేందుకు వీరప్ప మొయిలీ హైదరాబాద్ వెళ్తున్నట్లు బుధవారం ఉదయం వార్తలు వచ్చాయి. ఈ నేపథ్యంలో వాటిపై వీరప్ప మొయిలీ వివరణ ఇచ్చారు.

ఉప ఎన్నికలు జరుగుతున్న నేపథ్యంలో సీనియర్లు భువనగిరి సభ పెట్టడం సరి కాదని ఆయన అన్నారు. ఉప ఎన్నికల్లో తమ పార్టీ పోటీ చేస్తుందని, పార్టీ విజయానికి అందరూ కృషి చేయాల్సిన అవసరం ఉందని ఆయన అన్నారు. ఉప ఎన్నికల్లో పార్టీ విజయానికి సీనియర్లు కూడా కృషి చేయాలని ఆయన అన్నారు. సీనియర్లు ఏకపక్షంగా సభ జరపడం సరి కాదని ఆయన అన్నారు. సీనియర్ల చర్య పార్టీ ప్రయోజనాలను దెబ్బ తీస్తుందని ఆయన అన్నారు. అయితే కాంగ్రెస్ అధ్యక్షురాలు సోనియా గాంధీ రాజకీయ వ్యవహారాల సలహాదారు అహ్మద్ పటేల్ నుంచి సీనియర్లకు పిలుపు అందినట్లు సమాచారం.