సభ ఆగదు: రేపు ఢిల్లీకి సీనియర్లు

హైదరాబాద్: ఆరునూరైనా నల్లగొండ జిల్లా భువనగిరిలో ఈ నెల 24వ తేదీన తలపెట్టిన తెలంగాణ రణభేరి జరుగుతుందని కాంగ్రెస్ సీనియర్ నాయకులు స్పష్టం చేశారు. పార్టీ అధిష్ఠానవర్గంతో చర్చించేందుకు రేపు (గురువారం) ఢిల్లీకి వెళ్తున్నట్లు వారు తెలిపారు. ఎఐసిసి అధ్యక్షురాలు సోనియా గాంధీ రాజకీయ సలహాదారు అహ్మద్ పటేల్ నుంచి పిలుపు అందిన తర్వాత కాంగ్రెస్ సీనియర్లు సమావేశమయ్యారు. సభను రద్దు చేసుకోకూడదని వారు సమావేశంలో నిర్ణయించుకున్నారు.

మిగతా నాయకులతో చర్చించిన తర్వాతనే తాను ఏ విషయమైనా చెప్పగలనని వెంకటస్వామి అహ్మద్ పటేల్ తో చెప్పారు. ఈ మేరకు అహ్మద్ పటేల్ నుంచి ఫోన్ వచ్చిన వెంటనే వెంకటస్వామి మిగతా నాయకులకు సమాచారం అందించారు. దీంతో వారందరూ రెండోసారి సమావేశమయ్యారు. మొదట సోనియాతో చర్చించడానికి ఢిల్లీ రావాల్సిందిగా అహ్మద్ పటేల్ వెంకటస్వామిని ఆహ్వానించినట్లు సమాచారం. ఇదిలా ఉంటే, ఉప ఎన్నికలపై కసరత్తుకు ముఖ్యమంత్రి డాక్టర్ వైయస్ రాజశేఖర రెడ్డి గాంధీభవన్ లో బుధవారం సాయంత్రం సమావేశమయ్యారు.